ЗЕЛЕНСКИ НАЈАВИ ПРЕСВРТ – Ќе се откажеме од членство во НАТО под еден услов

Откако претставниците на американскиот претседател Доналд Трамп, Стив Виткоф и Џаред Кушнер, ја откажаа средбата со украинскиот претседател Володимир Зеленски на почетокот на минатата недела по нивната посета на Москва, тие конечно остварија телефонски разговор со него.

Главните теми на разговор беа територијалните прашања и безбедносните гаранции за Украина, кои треба да ги обезбедат САД, НАТО и Русија. Американската агенција Axios ги нарекува овие „критични прашања“ и истакнува дека е потребен територијален компромис, но дека најважни се безбедносните гаранции од САД.

Украинскиот амбасадор во САД, Олха Стефанишина, изјави:

„Главните несогласувања се околу територијалните прашања и безбедносните гаранции. Ние се стремиме договорените решенија да бидат реални, фер и одржливи.“

Зеленски нагласува дека договорот треба јасно да ги дефинира гаранциите за украинската безбедност, со цел да се отстрани заканата од евентуална нова руска агресија.

Иако не е познато дали се разговарало за членството на Украина во НАТО, според извори од Киев, Украина би се согласила да не стане формална членка на алијансата, доколку добие цврсти гаранции дека ќе ѝ се помогне во случај Русија повторно да нападне.

Со други зборови, се бара да се примени членот 5 од НАТО за Украина, иако не е членка – член 5 предвидува дека сите земји членки ќе ѝ помогнат на нападнатата држава.

Од друга страна, според неофицијални извори од Кремљ, Русија категорично ја исклучува оваа точка. Москва бара ограничување на големината и силата на украинската армија, забрана за украинско членство во НАТО и писмена обврска на НАТО дека нема да се шири на исток. Според Jutarnji.hr, Русија сака да спречи приклучување на Грузија, Молдавија и Ерменија кон алијансата.

Во Киев ваквиот предлог се смета за потенцијална стапица која би ѝ овозможила на Русија да интервенира повторно во иднина.