ЗАПОЧНУВА „ЗЛАТНА РАМКА“ – тридневна ревија на македонски филмови во МКЦ

Од денеска до 28 јуни, во киното „Фросина“ при Младинскиот културен центар (МКЦ) ќе се одржи седмото издание на филмската ревија „Златна рамка – Денови на македонскиот филм“, во организација на Друштвото на филмските работници на Македонија (ДФРМ). Влезот за сите проекции е бесплатен.

Ревијата ќе прикаже најнови кратки, документарни и долгометражни македонски филмови. На 26 јуни ќе се прикажат пет кратки филмови од млади и веќе афирмирани автори. На 27 јуни следува документарниот „Време на бетон“ (19:00) и долгометражниот „Убиј ги прво децата“ (20:30). На 28 јуни, во програмата се „Богатство“ (18:00) и „Најтешкото нешто“ (20:00), кој ќе има и посебна проекција за жителите на Домот за стари лица „Мајка Тереза“.

Ова издание е посебно значајно бидејќи се совпаѓа со 75-годишниот јубилеј од основањето на ДФРМ. „Златна рамка“ останува платформа за промоција, дијалог и поврзување на македонските филмски автори со публиката.