ШТО НАВИСТИНА СЕ СЛУЧИ НА АЛЈАСКА Лавров тврди дека има договор, Рубио возвраќа нема никаков договор
По историската средба меѓу Трамп и Путин, Москва и САД излегоа со различни толкувања на тоа што навистина било договорено.
Рускиот министер за надворешни работи Сергеј Лавров реагираше на изјавата на американскиот државен секретар Марко Рубио дека средбата меѓу Владимир Путин и Доналд Трамп во Алјаска не донела договор, туку само предлози за можен пристап кон решавање на украинската криза.
Лавров тврди дека американските идеи биле разгледани и прифатени од руската страна. Според него, пред состанокот во Алјаска, специјалниот пратеник на Трамп, Стив Виткоф, ги претставил предлозите во Москва, по што Путин најавил дека ќе го изнесе својот став за време на разговорите со американскиот претседател.
Рускиот дипломат објасни дека на средбата во Анкориџ, Путин ги навел американските предлози точка по точка и побарал од Виткоф да потврди дали правилно ги пренел ставовите што претходно ги доставил до Москва. Според Лавров, одговорот на американскиот претставник бил потврден за секоја точка.
„Ако едната страна ги предложи чекорите за решавање на кризата, а другата ги прифати, тогаш тврдењето дека немало договор не изгледа целосно логично“, изјави Лавров.
Тој додаде дека изјавите на Рубио дека САД се подготвени да имаат конструктивна улога во приближувањето на ставовите на страните покажуваат дека Вашингтон сепак се обидува да влијае врз процесот.
Лавров оцени дека ова е доказ оти американските предлози биле предмет на разговор во Алјаска и дека Москва ги прифатила како основа за понатамошни чекори.
Сепак, останува отворено прашањето дали станува збор за вистински договор или само за согласност околу можен модел за продолжување на преговорите, бидејќи Вашингтон претходно нагласи дека конечен договор за решавање на конфликтот не бил постигнат.
