ВТОР КОНКУРС – 46 ракописи за наградата „Оливера Николова“
Одлуката за добитникот ќе биде објавена на 11 март, на денот на раѓањето на писателката
На вториот конкурс за наградата „Оливера Николова“ за најдобар необјавен роман за деца и млади, кој беше отворен од 11 септември 2025 до 11 јануари 2026 година, пристигнаа 46 ракописи.
Пристигнатите дела ќе ги оценува тричлена жири-комисија составена од: Оливера Ќорвезироска (уредничка и писателка), Ермис Лафазановски (прв добитник на наградата во 2025 година) и Јованка Денкова (професорка по книжевност за деца).
Одлуката за добитникот на наградата за 2026 година ќе биде објавена на 11 март, на денот на раѓањето на Оливера Николова.
Наградата е откупна и се состои од паричен износ од 60.000 денари, статуетка и објавување на романот во посебна едиција на издавачката куќа „Арс Ламина“. Таа ќе биде врачена на посебен свечен настан.
Наградата „Оливера Николова“ за најдобар необјавен роман за деца и млади ја востанови издавачката куќа „Арс Ламина“, со поддршка на семејството на Николова, на 11 март 2025 година. Николова почина на 3 ноември 2024 година.
Мисијата на наградата е двојна: да се одржи континуитетот на големото авторско име на Оливера Николова, со симболично творечко продолжување на нејзината значајна трага во современата македонска книжевност, и да се ревитализира еден од жанровите во кои таа создаваше – романот за деца и млади.
На првиот конкурс победник беше романот „Џинџуџе“ од Ермис Лафазановски, избран од вкупно 38 пристигнати ракописи. Во најтесниот избор за наградата беше и ракописот „Сам во рој“ од Иван Дричко (псевдоним на Сашо Кокаланов).
