ВОЈНА И СЕ Е МОЖНО – Трамп ем го напаѓа Иран, ем му дозволува да продава нафта

Администрацијата на Доналд Трамп привремено ги ослободи санкциите за 140 милиони барели иранска нафта што се наоѓаат на отворено море, со цел да се забави растот на цените на енергенсите. Сепак, овие залихи ќе се потрошат за само една недела.

Функционерите на Белата куќа се обидуваат да обезбедат секој достапен барел нафта во услови на енергетска криза, дури и ако тоа значи укинување на санкциите против Иран. По три недели од почетокот на конфликтот, опциите за контролирање на цените се ограничени, а зголемувањето на цените би можело да трае со месеци, особено поради интензивирањето на судирите на Блискиот Исток и затворениот премин низ Ормускиот теснец.

САД веќе користеа дел од стратешките резерви, ублажија дел од санкциите врз руската нафта и ја забрзаа дистрибуцијата на сурова нафта низ земјата. Сепак, овие мерки малку влијаеле на глобалниот пораст на цените. Брент суровата нафта достигна 112 долари за барел, додека цената на бензинот во САД се приближува до 4 долари за галон.

Привременото укинување на санкциите им овозможува на сојузниците да купат нафта од Иран, наместо таа да оди во Кина, ублажувајќи дел од краткорочните проблеми со снабдувањето. Министерот за финансии, Скот Бесент, го опиша потегот како „користење на иранските барели против Техеран за одржување на ниски цени“.

И покрај ова, Иран ќе оствари финансиска добивка од продажбата, а ефектот врз цените ќе биде краткотраен. Администрацијата се подготвува и за други чекори, како ограничување на еколошките регулативи за летните мешавини на бензин, но нивниот ефект веројатно ќе биде ограничен.

Експертите предупредуваат дека глобалната потрошувачка е толку голема што 140 милиони барели се еднакви на околу еден и пол ден потрошувачка на нафта, што значи дека нафтата на море брзо ќе се распродава.