ВО БУГАРИЈА НЕМА ПРОШКА ЗА ПРЕБРЗО ВОЗЕЊЕ Двајца Македонци останаа без автомобили
Едниот возел 102, другиот 100 километри на час. Бугарската полиција им изрече двомесечна забрана за возење, а автомобилите им ги исклучи од сообраќај на еден месец.
Двајца возачи од Македонија се санкционирани во Бугарија поради сериозно пречекорување на дозволената брзина во близина на граничниот премин Ѓуешево, на бугарско-македонската граница.
Според информациите од бугарските власти, 22-годишен возач на автомобил „Сеат Леон“ бил регистриран како се движи со брзина од 102 километри на час, додека 36-годишен возач на „Шкода“, кој е државјанин на САД, возел со 100 километри на час.
Двајцата биле запрени од сообраќајната полиција и спроведени до секторот „Патна полиција“ во Ќустендил, каде што им биле изречени соодветни санкции за прекршоците.
Двомесечна забрана за возење и еден месец без автомобил
На двајцата возачи им е изречена забрана за управување со моторно возило во траење од два месеца, а нивните автомобили се исклучени од сообраќај во период од еден месец.
Возилата се оставени на паркингот на Окружната дирекција на Министерството за внатрешни работи во Ќустендил.
Идентична санкција добил и 60-годишен државјанин на Србија, кој во селото Грлјано бил фатен како управува автомобил „Лотус“ со брзина од 99 километри на час.
Случаите се однесуваат на сериозни прекршоци за пречекорување на брзината, за кои бугарските власти предвидуваат строги мерки, вклучително и привремена забрана за управување и исклучување на возилата од сообраќај.
