ВНИМАВАЈТЕ, ИЗМАМНИЦИТЕ ВЕЌЕ НЕ СЕ ПРЕПОЗНАВААТ ПО ЛОШИОТ ПРЕВОД – ВИ може да ве измами како никогаш досега

Дигиталните технологии значително го олеснија секојдневието, но истовремено отворија простор за нови и сè пософистицирани форми на измама. Сајбер-криминалците користат е-пошта, СМС-пораки, апликации за допишување, социјални мрежи, телефонски повици, лажни веб-страници и кјуар-кодови за да дојдат до лични и финансиски податоци или да ги наведат граѓаните да уплатат пари.

Еден од најчестите начини на измама е фишингот – техника со која измамниците се обидуваат да ја изманипулираат жртвата за да ѝ ги украдат корисничкото име и лозинката, ПИН-кодот, еднократниот код за авторизација, податоците од банкарската картичка или други доверливи информации.

Иако фишингот долго време најчесто се поврзуваше со е-пошта, денес измамите се шират преку речиси сите комуникациски канали.

Кога измамниците користат СМС-пораки, станува збор за „смишинг“, додека измамите преку телефонски повици се познати како „вишинг“. Сè почесто се злоупотребуваат и Ватсап, Вибер и други апликации за допишување, социјалните мрежи, како и кјуар-кодови кои корисникот го насочуваат кон лажни веб-страници.

Вештачката интелигенција им ја олеснува работата на измамниците

Времето кога измамничката порака лесно се препознаваше по лошиот превод, чудните изрази и бројните правописни грешки полека станува минато.

Развојот на вештачката интелигенција им овозможува на измамниците за кратко време да создадат убедливи и јазично исправни пораки. Тие можат многу подобро да го имитираат начинот на комуникација на банки, телекомуникациски оператори, државни институции и други познати организации.

Дополнителен ризик е тоа што измамниците понекогаш располагаат со вистински податоци за лицето што го контактираат – име, телефонски број или адреса на е-пошта.

Но, самото знаење на овие податоци не е доказ дека комуницирате со доверлива институција или лице.

Токму затоа, доколку некој се претставува како банка, оператор, државна институција или друга организација, потребно е дополнително да се провери неговиот идентитет, наместо автоматски да му се верува.

Не верувајте ниту на гласот или фотографијата

Технологијата создава уште еден сериозен предизвик – измамниците сè полесно можат да генерираат убедливи фотографии, видеа и гласови.

Тоа значи дека дури и гласот на близок човек, фотографија, видео или порака што изгледа целосно автентично, повеќе не мора да бидат доволен доказ за нечиј идентитет.

Затоа, при секое сомнително барање за пари, лозинки, ПИН-кодови или други чувствителни податоци, најважно е да се запре, да не се кликнува на непознати линкови и информацијата да се провери преку официјален канал.