УСТАВНИОТ СУД НА РОМАНИЈА ОДЛУЧИ Отфрлена жалбата на Џорџе Симион за поништување на изборните резултати
Уставниот суд на Романија денеска ја отфрли жалбата на Џорџе Симион, лидерот на крајнодесничарската партија Алијанса за обединување на Романците (АУР), со која бараше поништување на резултатите од вториот круг на претседателските избори одржан на 18 мај.
Судот едногласно ја отфрли жалбата како неоснована, соопшти Централното изборно биро на Романија, нагласувајќи дека одлуката е конечна и не може да се обжали.
Симион, кој изгуби во вториот круг од независниот кандидат и актуелен градоначалник на Букурешт, Никушор Дан, тврдеше дека имало „надворешно мешање“ во изборниот процес. Неговото барање беше регистрирано во Уставниот суд само ден пред одлуката.
Изборите од мај беа повторени откако Уставниот суд го поништи претходното гласање од ноември минатата година, поради сомнежи за руско влијание во корист на тогашниот победник во првиот круг, крајнодесничарскиот независен кандидат Калин Георгеску. Како резултат на тоа, целокупниот изборен процес беше рестартиран.
Во неделата, Никушор Дан освои 53,60% од гласовите, додека Џорџе Симион доби поддршка од 46,40% од избирачите.
Одлуката на Уставниот суд го потврдува изборниот резултат и ја отвора вратата за официјално стапување на функција на новоизбраниот претседател, Никушор Дан.
