ТРГНУВАТЕ НА ПАТ Еве каква е состојбата низ Македонија и кои делници бараат посебно внимание
Сообраќајот се одвива непречено по суви коловози, нема задржувања на граничните премини, но возачите се предупредуваат на одрони и бројни активни работи на патиштата.
Сообраќајот на државните патишта во Македонија утрово се одвива непречено и по суви коловози, информираат од Авто-мото сојузот на Македонија (АМСМ).
Интензитетот на сообраќајот надвор од градските средини е умерен, а на сите гранични премини од македонска страна нема подолги задржувања ниту за влез, ниту за излез од државата.
Од АМСМ апелираат возачите да ја прилагодат брзината на условите на патот, да ја почитуваат сообраќајната сигнализација и да бидат особено внимателни на делниците низ котлините, речните долини и клисурите, каде постои можност од појава на одрони. Најризични се патните правци Катланово – Велес, Маврово – Дебар – Струга, Виница – Берово и Кочани – Делчево.
Летен режим за камионите – стартува од 1 јули
Од 1 јули до 31 август стапува на сила летниот режим на сообраќај, со кој се ограничува движењето на тешките товарни возила над 15 тони во викендите и во денови со екстремно високи температури.
Забраната ќе важи во петок: од 17:00 до 22:00 часот, сабота од 09:00 до 18:00 часот и недела од 09:00 до 22:00 часот.
Во денови со екстремно високи температури, ограничувањето ќе се применува и од понеделник до четврток, во периодот од 11:00 до 17:00 часот.
Посебни ограничувања кон Охрид
На магистралниот пат А2 Скопје – Охрид, до 1 септември важи дополнителна забрана за товарни возила над 7,5 тони за време на викендите, со цел да се намалат сообраќајните метежи во туристичката сезона и да се овозможи побрз проток на возилата кон Охрид.
Внимавајте – градежни работи на повеќе делници
Возачите треба да сметаат на изменет режим на сообраќај поради градежни активности на повеќе патни правци, меѓу кои:
- автопатот Гостивар – Стража, каде се санираат неколку мостови;
- мостовите кај Желино на автопатот А2;
- делницата Смоквица – Гевгелија поради изградба на интерконективен гасовод;
- скопската обиколница, каде се врши рехабилитација со затворена лева лента;
- регионалниот пат Косоврасти – Мелнички Мост поради санација на свлечиште;
- патниот правец Прилеп – Битола, каде поради изградбата на Коридорот 10Д сообраќајот е пренасочен по регионалниот пат.
Од АМСМ препорачуваат сите учесници во сообраќајот пред поаѓање да се информираат за актуелната состојба на патиштата и да возат внимателно, особено во деловите каде има времен режим на сообраќај и можност од одрони.
