ТРАМП УДРИ ПО ШПАНИЈА – Ќе плаќа двојно ако не го исполни планот на НАТО

Американскиот претседател Доналд Трамп повторно ја шокираше европската јавност со остри коментари на сметка на сојузниците во НАТО, посебно насочени кон Шпанија. Говорејќи пред новинари, Трамп го обвини Мадрид дека се обидува да ја избегне новата цел на Алијансата за трошење 5% од БДП за одбрана, велејќи дека ќе преговара директно со шпанските власти и ќе ги натера да „плаќаат двојно“.

„Ја сакам Шпанија, тоа е прекрасна земја и тие се одлични луѓе. Но Шпанија е единствената земја што отворено одбива да плати. Сакам фер однос. Ако не го исполнат тоа преку НАТО, ќе го надоместат преку трговија“, изјави Трамп.

Според него, неколку лидери на земји-членки му се пожалиле дека веќе со децении се обидуваат да го достигнат прагот од 3%, а сега се соочуваат со нова, уште поамбициозна цел. Сепак, тој верува дека „скоро сите“ членки на НАТО ќе го постигнат новиот праг, додека ја пофали Полска како една од ретките кои досега ја исполниле претходната обврска од 2%.

„Европа ќе мора да вложува во сериозна воена опрема – по можност американска“, рече Трамп, подвлекувајќи го економскиот интерес зад неговиот повик за зголемени вложувања во одбраната.

Во однос на руската агресија врз Украина, Трамп рече дека верува оти претседателот Владимир Путин сака крај на конфликтот, но призна дека ситуацијата е многу покомплексна од тоа што изгледа.

„Моето претходно ветување дека ќе ја завршам војната за 24 часа беше саркастично. Тоа е многу потешко отколку што луѓето мислат“, рече тој.

Тој додаде дека планира директни разговори со Путин за мир, но предупреди дека рускиот лидер би можел да има територијални претензии и надвор од Украина.

На прашањето за неговите односи со НАТО и генералниот секретар Марк Руте, кого го нарече „тато“, Трамп изјави дека има добра комуникација, но одби да каже дали Алијансата може да опстане без поддршката на САД.

Исто така, тој најави дека следната недела ќе се одржат разговори со ирански претставници, иако изрази скепса дека ќе се постигне договор.

„Иран и Израел се исцрпени од конфликтот, и мислам дека нема да има нова ескалација“, додаде Трамп.

Според него, поголемата улога на Европа во сопствената одбрана ќе биде клучна за спречување на идни конфликти како оној во Украина.