ТРАМП ГО ПРЕЧЕКА ИНТЕР МАЈАМИ И МЕСИ ВО БЕЛАТА КУЌА – Зборуваше за тоталното целосно уништување на иранските сили

Претседателот на САД, Доналд Трамп, го искористи приемот за фудбалерите на Интер Мајами за да зборува за „тоталното уништување“ на иранските воени сили, додека светски познатиот фудбалер Лионел Меси и неговите соиграчи стоеја зад него. Настанот се одржа во чест на победата на Интер Мајами во МЛС Купот во 2025 година, а Трамп влезе во просторијата придружуван од Меси, според извештајот на The Independent.

„Американската војска, заедно со нашите израелски партнери, продолжува целосно да го поразува непријателот, многу побрзо отколку што се очекуваше, и на нивоа што никој претходно не ги видел“, рече Трамп. Во просторијата беа присутни целиот тим, вклучувајќи ги Луис Суарез и тренерот Хавиер Маскерано.

„Секој час уништуваме сè повеќе ирански ракети и беспилотни летала, онеспособувајќи ги на начин што многумина не би го поверувале“, продолжи тој, додека играчите зад него непријатно се поместуваа.

Трамп истакна дека воената операција, наречена „Операција Епски бес“, е многу успешна:

„Штом ќе ја испукаат ракетата, во рок од четири минути нивниот фрлач е погоден. Тие дури и не знаат што ги погодило. Имаме најмоќната војска во светот, а нивната морнарица е исчезната – 24 бродови за три дена.“

Претседателот го оправда воениот удар, тврдејќи дека „немало избор“ и дека Иран прв се заканил кон САД:

„Навистина немавме избор. Да не ги погодевме, тие ќе нè погодеа нас. Тие се луди.“

„Им ја расипавме забавата“, додаде Трамп, објаснувајќи дека иранските претставници сега „се јавуваат“ за да побараат договор. Светските медиуми објавија снимка од неговиот говор, при што Меси стоеше зад него и „видливо се чувствуваше непријатно“.

Откако кратко зборуваше за економијата и за операциите на Куба, особено потенцирајќи го државниот секретар Марко Рубио, Трамп се сврте кон фудбалерите. Тој се пофали дека е единствениот претседател кој успеал да го доведе Меси во Белата куќа:

„Голема чест ми е да кажам нешто што ниту еден претседател досега немал можност да го каже. Го поздравувам Лионел Меси во Белата куќа“, рече Трамп.

Тој додава дека неговиот најмлад син, Барон, бил особено возбуден за настанот.

Трамп раскажа и кратка анегдота:

„Синот ме праша: ‘Тато, знаеш ли кој доаѓа денес?’ Му реков дека не знам, сум многу зафатен. Тој рече: ‘Меси’. Јас реков: ‘Навистина?’ Тој е твој голем обожавател. Мисли дека си едноставно одлична личност“, му рече Трамп на аргентинската суперѕвезда, која учтиво се насмевна и кимна со главата.

Трамп додаде и комплименти за другите светски фудбалски ѕвезди:

„Мислам дека вие двајца малку се запознавте. Синот е голем навивач, но и голем ваш обожавател. И еден господин по име Роналдо Кристијано. Одлично е да се игра со големи шампиони и со луѓе кои го сакаат она што го прават. Чест ни е нам и на сите во Белата куќа да ви оддадеме почит денес.“