ТЕНЗИИТЕ РАСТАТ – Куба бара рамноправни разговори, САД одбива

Белата куќа денес го отфрли барањето на Куба разговорите со САД да се одвиваат само на рамноправна основа. Портпаролката Каролин Ливит истакна дека дипломатските контакти со Куба се во тек.

„Со оглед на тоа дека кубанската влада се соочува со сериозни проблеми и земјата е пред колапс, тие треба да бидат внимателни во изјавите до претседателот на САД“ – рече Ливит на прес-конференција, одговарајќи на коментарите на кубанскиот претседател Мигел Дијаз Канел.

Ливит додаде дека американскиот претседател Доналд Трамп „секогаш е подготвен за дипломатија“ и дека таа смета дека кубанската влада во моментов е подготвена за дијалог.

Претходно, Дијаз Канел изјави дека Куба е подготвена да разговара со САД, но „само на рамноправна основа“ и со услов дека САД нема да се меша во внатрешните работи на Куба или да го нарушува нејзиниот суверенитет.

Тензиите меѓу двете земји се зголемија минатата недела, откако САД најавија воведување царини за стоки од земјите што снабдуваат нафта за Куба. Ова доведе до зголемување на цените на храната и транспортот, сериозен недостиг на гориво и продолжени прекини на електричната енергија, дури и во Хавана.

Во јануари, претседателот Трамп соопшти дека Куба повеќе нема да добива нафта од својот главен снабдувач, Венецуела.