ТАЕН ДОКУМЕНТ, БИА И ВИКТОР МАКЕДОНИЈА Што открива обвинението од Косово
Поранешниот советник на Зоран Заев се споменува во случајот против Фатмир Шехоли, но тој категорично негира каква било поврзаност со разузнавачки мрежи.
Името на Виктор Петрушевски, поранешен советник на тогашниот премиер Зоран Заев за локална самоуправа, се појавува во актуелниот случај во Косово поврзан со Фатмир Шехоли, познат политички аналитичар кој е обвинет за шпионажа и уцена.
Според косовските медиуми, Специјалното обвинителство на Косово на 25 август поднело обвинение против Шехоли за две кривични дела шпионажа и уцена. Во обвинителните материјали се споменува комуникација меѓу Шехоли и лице идентификувано како Виктор Петрушевски.
Според наводите во обвинението, Шехоли на 20 и 21 декември 2024 година комуницирал со Петрушевски преку „WhatsApp“, при што, како што тврди обвинителството, биле преземени активности за организирање средба со Бојан Димиќ, кој во предметот е идентификуван како службеник на српската Безбедносно-информативна агенција (БИА).
Во комуникација од 22 декември, според објавените делови од обвинението, Шехоли му напишал на Петрушевски дека треба да биде подготвен да одговори на прашањата од лицето со кое требало да разговара.
Обвинителството тврди дека средбата била одржана на 25 декември 2024 година. Според обвинителните материјали, истиот ден Шехоли му кажал на Петрушевски дека се наоѓа во ресторан, по што му го испратил телефонскиот број за кој истражителите утврдиле дека го користел Бојан Димиќ.
Косовското обвинителство го наведува Димиќ како службеник на БИА, додека дел од косовските медиуми го поврзуваат со раководна функција во рамките на српската безбедносна служба.
Во предметот се појавува и контакт зачуван во телефонот на Шехоли под името „Виктор Македонија“. Според косовските медиуми, токму ова име, во комбинација со другите податоци во обвинителните материјали, е причината поради која лицето е идентификувано како Виктор Петрушевски.
Дополнително, во обвинението се наведува дека на 5 август 2025 година Шехоли испратил документ со ознака „Top Secret 2“ до лице заведено како „Виктор Македонија“.
Според косовските медиуми, документот содржел наводен политички и стратешки план поврзан со ширењето на исламскиот радикализам во Косово и регионот. Во него, како што се наведува, се зборува за изградба и проширување на верски објекти, како и за создавање влијателни мрежи во спортот, медиумите, музиката и политиката.
Обвинителството смета дека овој документ е дел од поширокиот материјал со кој треба да се покаже какви информации и документи Шехоли разменувал со лица за кои се тврди дека биле поврзани со српските безбедносни структури.
Петрушевски ги отфрла наводите
Петрушевски, во изјава за ТВ „Алсат“, ги отфрла наводите дека бил дел од каква било разузнавачка мрежа.
Тој вели дека со Шехоли се запознал пред две до три години и дека првично комуницирале за политички и економски случувања во регионот.
Според Петрушевски, Шехоли подоцна се интересирал за неговите деловни активности, особено во периодот кога била актуелна темата со јагленот. Како што наведува Петрушевски, Шехоли му кажал дека има контакти во Србија и дека може да го поврзе со луѓе кои би можеле да му помогнат во бизнисот.
„Ми испрати контакт-број од лице од Србија. Кога дознав за кого станува збор и дека истиот нема врска со овој бизнис, решив никогаш да не контактирам“, изјавил Петрушевски за „Алсат“.
Тој додава дека Шехоли му препорачал контакти и со други лица, со кои, како што вели, имал кратка средба, но потоа не продолжил со комуникацијата.
Кој е Виктор Петрушевски?
Петрушевски во минатото бил директор на АД „Аеродромски услуги“, а во јануари 2021 година бил назначен за советник на премиерот Зоран Заев за локална самоуправа.
Во актуелните косовски извештаи е опишан како македонски бизнисмен. „Алсат“, повикувајќи се на свои проверки, објави дека денес се занимава со бизнис во областа на нафтените деривати и градежништвото.
Во јавноста неговото име се појавувало и во политички контекст. На 18 април 2017 година ВМРО-ДПМНЕ објави дека Виктор Петрушевски, тогаш член на Извршниот одбор на СДСМ и раководител во „Куманово гас“, бил задржан од српските царински служби поради поголема сума пари.
Од ВМРО-ДПМНЕ тогаш тврдеа дека Петрушевски се обидел да ја изнесе готовината од земјата без да ја пријави, а поставија и прашања за потеклото и намената на парите.
Партијата тогаш изнесе и сомневања дека средствата можеле да бидат поврзани со српската невладина организација КАНВАС и со активности поврзани со Шарената револуција. Овие тврдења на ВМРО-ДПМНЕ од 2017 година беа партиски обвинувања и не претставуваат доказ за каква било поврзаност на Петрушевски со актуелниот случај во Косово.
Во меѓувреме, Шехоли останува обвинет во Косово за шпионажа и уцена. Според обвинението, тој наводно бил регрутиран од БИА и собирал и пренесувал информации и документи поврзани со политичките активности, безбедносната состојба и функционирањето на косовските институции.
Тој е обвинет и дека од едно лице од Косово барал повеќе од 13.000 евра. Предметот се води пред Основниот суд во Приштина, а првото рочиште е најавено за 7 септември.
Самото споменување на Петрушевски во обвинителните материјали не значи дека против него е покренато обвинение или дека е утврдена негова вмешаност во кривично дело. Неговата улога и значењето на комуникациите допрва треба да бидат предмет на судска оценка.
