СОСТОЈБА НА ПАТИШТАТА Одрон кај Отешево – Сирхан, влажни коловози и тековни градежни работи

Утрово, на 28 ноември 2025 година, сообраќајот на државните патишта се одвива непречено, но по влажни коловози, што бара зголемена претпазливост кај возачите. На патниот правец Отешево – Сирхан е регистриран одрон, поради што движењето е ограничено на една лента.

Од 15 ноември е во сила законската обврска за задолжително поседување зимска опрема во сите возила, независно од моменталните временски услови, а ќе трае до 15 март 2026 година. Интензитетот на сообраќајот надвор од градските средини е умерен, а на граничните премини нема подолги задржувања за влез и излез од државата.

АМСМ апелира до возачите да се придржуваат до поставената сообраќајна сигнализација, да ја прилагодат брзината и да бидат внимателни на делниците низ котлините, речните долини и клисурите, каде што постои зголемена опасност од појава на одрони. Особено внимателно треба да се вози на релациите Катланово – Велес, Маврово – Дебар – Струга, Виница – Берово и Кочани – Делчево.

Патниот правец Охрид – Ресен преку националниот парк Галичица и оваа сезона е затворен за сообраќај. Забраната е во сила од 21 ноември годинава и ќе трае до 31 март следната година.

Во тек се повеќе градежни активности на различни делници низ државата, кои предизвикуваат привремени измени во режимот на движење. На обиколницата околу Скопје, на делови од државниот пат А2, се изведува санација на потпорни ѕидови. Поради овие активности е променет режимот на сообраќајот, а на делот меѓу клучките Волково и Кондово движењето е целосно затворено во еден правец и пренасочено во другата лента.

На експресниот пат А2, кај Крива Паланка – Страцин, во близина на селото Петралица, сообраќајот се регулира со знаменца во текот на денот, а навечер со семафорска сигнализација, поради градежни зафати на делницата. Свлечиште на регионалниот пат Косоврасти – Мелнички Мост предизвикува привремен изменет режим на движење, кој ќе трае сè до завршување на санацијата.

Продолжува и санацијата на мостот Здуње на патот Гостивар – Стража, каде што возилата се пропуштаат наизменично. На експресниот пат А1, делницата Градско – Дреново, важи привремена пренасочена маршрута поради проектот за изградба на нова патна делница.

Работи се изведуваат и на мостот на реката Драгор во Битола, каде сообраќајот е пренасочен по алтернативен премин. Затворена е и делницата Кичево – село Цер во одредени периоди во текот на денот поради асфалтирање.

На патот Желино – Тетово продолжуваат геодетските снимања, поради што една лента е повремено затворена. Се врши и реконструкција на дилатациони спојки на автопатот Неготино – Велес. Привремени измени има и на патниот правец Прилеп – Битола, каде движењето е пренасочено по регионален пат поради работи поврзани со Коридорот 10Д.

На делови од експресниот пат Градско – Дреново се врши монтажа на одбојна ограда, што предизвикува делумни затворања и пренасочувања. На автопатот Фариш – Прилеп се изведува санација на ударни дупки, а на делницата Прилеп – Битола уште од минатата година е во сила алтернативна траса, која ќе важи додека траат градежните активности.

Возачите се повикуваат да ги следат информациите за тековната состојба на патиштата и да планираат движење навреме, со оглед на бројните реконструкции и временски пренасочувања.