ПРОДОЛЖУВА СУДСКИОТ КОНФЛИКТ МЕЃУ ФИФА И УЕФА Светската организација обвинува за клеветничка кампања
УЕФА бара пристап до документацијата за ФИФА Форвард Ентерпрајз и најавува можни кривични постапки во Швајцарија.
Судирот меѓу ФИФА и УЕФА продолжува и во американските судови. Светската фудбалска организација ги оцени правните постапки што ги покрена европското тело како дел од „клеветничка кампања“ насочена против ФИФА и нејзиното раководство.
УЕФА бара пристап до документи и докази поврзани со контроверзниот план за привлекување приватни инвестиции во ФИФА Форвард Ентерпрајз (ФФЕ), компанија формирана за управување со Светското првенство и други турнири под покровителство на ФИФА. Европската организација од судовите во САД побара да издадат наредба со која би ѝ се овозможил пристап до бараната документација.
ФИФА минатиот месец потврди дека планот предвидувал приватни инвеститори да стекнат 20 отсто удел во ФФЕ. Сепак, претседателот на организацијата Џани Инфантино на 1 август го повлече предлогот, по силното противење од УЕФА, Азиската фудбалска конфедерација и КОНКАКАФ, која ги обединува фудбалските асоцијации од Северна и Централна Америка и Карибите.
И покрај повлекувањето на планот, УЕФА продолжи со правните активности, барајќи одговорност од Инфантино и други функционери на ФИФА.
Според судските документи до кои на 27 август дошла Прес Асоцијацијата, УЕФА навела дека бараните материјали би можеле да се користат во подготовка за евентуални кривични постапки во Швајцарија.
Само еден ден подоцна, на 28 август, правниот тим на ФИФА побара од Окружниот суд на САД за Јужниот округ на Флорида дозвола да се спротивстави на барањето на УЕФА. Судот го одобрил барањето на 31 август, а ФИФА има рок до 28 септември да го достави целосниот приговор.
Слично барање за спротивставување е поднесено и пред Окружниот суд на САД за Јужниот округ на Њујорк.
Во документите доставени од правниот тим на ФИФА, а цитирани од Прес Асоцијацијата, се наведува дека барањата на УЕФА претставуваат „малку повеќе од соопштенија за медиумите“ и се дел од, како што тврди ФИФА, „кампања за клевета“ против организацијата и нејзиното раководство.
ФИФА во постапката во Њујорк побара судот да го одложи разгледувањето на апликацијата на УЕФА додека судот во Флорида не донесе одлука. Како алтернатива, светската фудбалска организација побара да ѝ биде дозволено да поднесе целосен приговор најдоцна до 30 септември.
