ПРИТИСОК НА САД ВРЗ РОДРИГЕЗ – Кубанските советници и лекари ја напуштаат Венецуела
Родригез се потпира на венецуелски телохранители наместо на кубански единици
Кубанските советници за безбедност и медицински работници постепено ја напуштаат Венецуела, откако владата на привремената претседателка Делсеа Родригез се соочува со зголемен притисок од Вашингтон да го распушти најважниот левичарски сојуз меѓу двете земји, објави Ројтерс, повикувајќи се на десетина извори.
Според четири извори, Родригез ја доверила својата лична заштита на венецуелските телохранители, за разлика од поранешните претседатели Николас Мадуро и Уго Чавез, кои се потпирале на елитни кубански единици. Во американскиот напад на 3 јануари, при кој Мадуро беше заробен, загинаа 32 Кубанци, кои биле дел од безбедносниот договор меѓу Каракас и Хавана од крајот на 2000-тите, интегрирани во венецуелската војска и во единицата за контраразузнавање DGCIM, клучна за потиснување на опозицијата.
„Кубанското влијание беше апсолутно неопходно за опстанокот на владата на Чавез“, вели историчарот Алехандро Веласко од Универзитетот во Њујорк.
Некои кубански советници веќе се отстранети од своите позиции во DGCIM, а дел од медицинските и безбедносните кадри патувале кон Куба во изминатите недели. Според еден извор блиску до владејачката партија, заминувањето се случило по наредба на Родригез поради притисок од САД. Сепак, не е јасно дали Кубанците заминале доброволно или биле повикани од властите во Хавана.
Прекинувањето на присуството на Кубанците во претседателската гарда и контраразузнавачките единици не беше официјално објавено. Пред тоа, илјадници кубански лекари, медицински сестри и спортски тренери работеа во Венецуела како дел од социјалните програми започнати од Чавез. Венецуела им обезбедуваше на Куба извор на нафта, додека американскиот претседател Доналд Трамп најави прекин на безбедносните односи меѓу двете земји.
Претставник на Белата куќа истакна дека САД имаат „многу добри односи со венецуелските лидери“ и веруваат дека интересите на Родригез се во согласност со целите на Вашингтон. Одлуката за прекин на односите со Куба е дел од стратегијата на САД да ја ослабнат комунистичката влада во Хавана, која од средината на декември е економски притисната преку блокада на испораката на нафта од Венецуела.
Кубанската влада се изјасни дека е отворена за дијалог „под еднакви услови“ и ја осуди американската интервенција. И двете земји, јавно, продолжуваат да ја потврдуваат својата континуирана соработка.
Родригез, долгогодишен сојузник на Мадуро и член на Социјалистичката партија на Венецуела, останува блиска и со кубанската влада. На почетокот на јануари таа учествуваше на комеморативна служба за жртвите од американскиот напад заедно со кубанскиот министер за надворешни работи Бруно Родригез, а подоцна телефонски разговараше со кубанскиот претседател Мигел Дијаз-Канел, потврдувајќи дека врските меѓу двете земји остануваат „обединети“.
Американски експерти истакнуваат дека Родригез е внимателна во односот со Куба, држејќи ги советниците на дистанца додека не се стабилизира нејзиниот авторитет, но без целосна контрола. Наследството на кубанските контраразузнавачки активности во Венецуела останува очигледно, иако Кубанците не успеале да го заштитат Мадуро, тие одиграле клучна улога во одржување на власта на чавистичката влада.
