ПРЕСВРТ ВО КРИЗАТА – Планот на Доналд Трамп неразумен и невозможен
Техеран тврди дека американскиот план е далеку од реалноста и открива дека нема директни разговори со Вашингтон.
Портпаролот на иранското Министерство за надворешни работи, Есмаил Багеи, изјави дека американскиот план од 15 точки за запирање на конфликтот содржи „претежно прекумерни, нереални и неразумни барања“. Со тоа директно ги оспори тврдењата на американскиот претседател Доналд Трамп дека Иран се согласил со поголемиот дел од предложените мерки.
Багеи нагласи дека во моментов нема директни преговори меѓу Иран и САД, туку комуникацијата се одвива исклучиво преку посредници.
„Досега немавме директни разговори со САД“, изјави тој на прес-конференција, пренесе ИРНА.
Според CNN, Багеи дополнително појаснил дека Иран не учествувал на неодамнешните регионални состаноци организирани од Пакистан, бидејќи тие се одвивале во рамка со која Техеран не се согласува.
„Состаноците што Пакистан ги организира со соседните земји се во рамка што тие самите ја креирале, а ние не бевме дел од тој процес“, истакна Багеи.
Во меѓувреме, Пакистан соопшти дека е подготвен да биде домаќин и посредник во можни разговори меѓу САД и Иран во наредните денови. Ова следи по четиристраниот состанок на министрите за надворешни работи од регионот, одржан во Исламабад.