ПОЗНАТ ДАТУМОТ НА ЛАНСИРАЊЕ НА НОВИОТ IPHONE – Премиерно на 9 септември

Apple објави дека ќе го одржи својот годишен настан за iPhone на 9 септември, во вторник, во кампусот Apple Park во Купертино. Настанот ќе започне во 10:00 часот по локално време, а поканети се избрани медиумски претставници. На овој настан, Apple ќе ја претстави новата iPhone 17 серија, која ќе вклучува и новиот ултра-тенок iPhone 17 Air.

Во новата серија, покрај iPhone 17 Air, ќе бидат присутни и стандардниот iPhone 17, iPhone 17 Pro и iPhone 17 Pro Max. Очекувањата се дека iPhone 17 Pro моделите ќе добијат нов дизајн со поиздржлива алуминиумска рамка и редизајниран заден модул за камерите во форма на лента. Сите модели од серијата ќе бидат опремени со новите A19 чипови или A19 Pro, а ProMotion 120 Hz екранот најверојатно ќе биде достапен и во основниот iPhone 17 модел.

iPhone 17 Air, кој ќе биде најтенкиот и најлесниот iPhone до сега, ќе го замени досегашниот Plus модел. Овој нов модел ќе има 6.6-инчен екран, сопствен Apple C1 модем за мобилна конекција и само една задна камера. Покрај новите телефони, Apple ќе ги претстави и Apple Watch Series 11, Apple Watch Ultra 3 и Apple Watch SE 3, што ќе биде прв пат по три години сите модели на Apple Watch да бидат обновени во исто време.

Исто така, можно е да бидат најавени и новите AirPods Pro 3 со редизајн, новиот HomePod mini и обновениот Apple TV 4K. Покрај новите хардверски производи, Apple ќе објави и датумите за лансирање на iOS 26, iPadOS 26, macOS Tahoe и останатиот нов софтвер.