ОРБАН МУ ДАДЕ ВЕТУВАЊЕ НА ВУЧИЌ ПО ИЗБОРНИОТ ПОРАЗ Секогаш сум на ваша страна“
Поранешните политички сојузници и блиски пријатели Александар Вучиќ и Виктор Орбан се сретнаа во Белград, испраќајќи порака дека пријателството не завршува со изборните порази.
Александар Вучиќ денеска во Белград го пречека унгарскиот политичар Виктор Орбан, со кого има долгогодишни блиски политички и лични односи. Средбата ја најави со фотографија и кратка порака:
„Виктор и јас. Приказна за еден пријател“.
Вучиќ не ја криеше радоста од посетата, нарекувајќи го Орбан „голем пријател“ и „брат“. Притоа, двајцата се осврнаа и на неодамнешните изборни порази.
„Многу сум среќен што можам да го угостам Виктор Орбан, мојот голем пријател, мојот брат. Ќе се забавуваме убаво тука, во куќата на мојот татко, во близина на Белград“, рече Вучиќ.
Тој испрати и порака за нивната политичка иднина:
„И да, двајцата неодамна ги загубивме изборите, но не го изгубивме достоинството, гордоста и верата. Добредојде, Виктор“, порача српскиот лидер.
Орбан му се заблагодари на Вучиќ за поканата и порача дека нивното пријателство останува силно и покрај политичките околности.
„Многу сум среќен што сум тука. Знаете, пријателите секогаш остануваат пријатели, а во тешки времиња се создаваат уште подобри пријателства. Можете да бидете сигурни, лично Александар, дека секогаш сум на ваша страна“, рече Орбан.
Тој потсети дека нивната соработка била многу повеќе од лично пријателство, оценувајќи дека придонела за подобрување на односите и за зајакнување на братските врски меѓу Србија и Унгарија, како и меѓу двата народа.
Орбан нагласи дека останува посветен на продолжување на соработката и изрази надеж дека Србија и српскиот народ ќе имаат успешна иднина.
„Ви посакувам вам, на вашето семејство и на вашиот народ сè најдобро. Нека ве благослови Бог“, порача Орбан.
Вучиќ на крајот кратко му се заблагодари, најавувајќи: „Ќе се вратиме“.
View this post on Instagram
