ОД СОНИШТА ДО ХОРОР Семејство патувало за нов живот во Лондон, но никогаш не стигна
Несреќата го остави целиот регион во длабока жалост, а последната фотографија од семејството стана симбол на една прекината иднина полна со соништа.
Светот остана потресен по трагичната авионска несреќа во Индија, кога летот АИ171 на авиокомпанијата „Ер Индија“, со 242 патници и членови на екипажот, се урна само неколку моменти по полетувањето. Несреќата се случи во областа Меганинагар во Ахмедабад, кога авионот удрил во комплекс на медицински колеџ и се запалил. До моментот е потврдено дека преживеало само едно лице.
Меѓу жртвите е и едно петчлено семејство од Бансвара – д-р Пратик Џоши, неговата сопруга д-р Коми Вјас и нивните три мали деца: близнаците Накул и Прајут (5) и најстарата ќерка Мираја (8). Последното селфи, направено само неколку минути пред полетувањето, прикажува насмеано семејство исполнето со надеж и радост – фотографии што денес остануваат како болно сведоштво за загубата.
Д-р Џоши, кој живееше и работеше во Лондон последните шест години, со нетрпение го очекуваше обединувањето со сопругата и децата. Неговата сопруга, почитувана докторка во болницата „Пацифик“ во Удаипур, неодамна дала отказ за конечно да се пресели во Велика Британија и да започнат нов заеднички живот.
„Коми неодамна ја напушти болницата за да му се придружи на сопругот во Лондон“, потврди портпарол од болницата за NDTV. Нивните пријатели и соседи ги опишуваат како „топол, амбициозен пар“ кој секогаш се стремел кон подобро за своето семејство.
„Целиот град тагува“, изјави близок семеен пријател за News18. „Тие беа инспирација – не само како професионалци, туку и како луѓе со отворено срце и напредни вредности.“
Несреќата го остави целиот регион во длабока жалост, а последната фотографија од семејството стана симбол на една прекината иднина полна со соништа. Истражните органи сè уште ги утврдуваат причините за падот на авионот.
