ОД БУГАРИЈА Ѝ ПОРАЧУВААТ НА МАКЕДОНИЈА Не се само Бугарите во Уставот, средете си го и судството, имате корупција и партиска администрација!

Бугарските медиуми во известувањата за најновиот извештај на Европската комисија за Македонија во преден план ги ставаат неисполнетите уставни измени и обврската за внесување на Бугарите во Уставот.

Бугарското национално радио (БНР) објавува дека Македонија нема напредок во преговорите за членство во ЕУ, додека телевизијата bTV известува под наслов „Без Бугари во Уставот нема пристапување во Европската Унија“. Сличен фокус има и порталот Dnes.bg.

Но, извештајот на ЕК не се однесува само на уставните измени. Брисел констатира дека нема напредок во борбата против корупцијата, која останува распространета, а предупредува и на одолговлекување на судските постапки и застарување на предмети за висока корупција.

Сериозни забелешки има и за политичките влијанија врз судството, недостигот од човечки и финансиски ресурси и бавното спроведување на реформите во јавната администрација.

Иако уставните измени се услов за продолжување на пристапниот процес, извештајот покажува дека Македонија има и сериозни домашни проблеми што не можат да се решат само со промена на Уставот.

Пораката на Брисел е јасна: европската интеграција бара не само исполнување на политичките услови, туку и конкретни резултати во борбата против корупцијата и владеењето на правото.