НОВИНА ВО ВЕЛИКА БРИТАНИЈА – Официјално признание на криптовалутите како личен имот

На 2 декември, со Кралската согласност, Велика Британија донесе закон кој дигиталните средства, вклучувајќи ги криптовалутите, ги признава како трета категорија на личен имот. Овој чекор ја затвора долгогодишната правна празнина која создаваше неизвесност за инвеститорите, бизнисите и судовите, пишува CryptoSlate.

Досега англиското право признаваше само два вида имот: физички работи („работи во посед“) и права што можат да се спроведат со тужби („работи во акција“). Криптовалутите не се вклопуваа во ниту една од овие категории. Судиите и адвокатите се потпираа на импровизации, користејќи доктрини создадени за бродови или обврзници, што правеше системот сложен и несигурен, особено при обезбедување, банкрот или сопственост по хакирање.

Новата законска рамка не воведува регулативни правила за крипто, туку само ја потврдува постојаноста на дигиталните средства како посебна категорија имот. Тоа значи дека судовите сега имаат јасна правна основа за следење и замрзнување на украдени криптовалути, при банкрот на берзи, полесно е да се утврди кои средства припаѓаат на корисниците, намалувајќи го ризикот тие да станат дел од стечајната маса и бидејќи англиското право се користи во многу меѓународни договори, ефектите ќе се почувствуваат и надвор од Обединетото Кралство.

Најголем ефект се очекува во финансиската сфера. Банки и инвестициони фондови сега имаат правна сигурност да прифаќаат криптовалути како колатерал, што отвора можност за нови финансиски производи.

Законот е важен и за Банката на Англија, која работи на регулации за системски стабилни монети, бидејќи јасниот имотен статус е предуслов за нивно безбедно функционирање. Со ова, Велика Британија, која го покрива Англија, Велс и Северна Ирска, ги престигна и ЕУ и САД, станувајќи првата западна земја со јасно правно признавање на дигиталните средства.

Важно е да се нагласи дека законот не регулира пазарот на крипто – даночните правила и лиценцираните берзи сè уште се под надлежност на регулаторите како FCA и Банката на Англија. Сепак, тој отстранува основна пречка и поставува цврста основа за иднината.

Со една реченица, долгогодишниот проблем за правниот статус на криптовалутите е решен, а корисниците на Bitcoin и Ethereum во Велика Британија влегуваат во 2026 година со појасни и посилни права од кога било досега.