НЕПЛАТЕНИ КАЗНИ НА СЕЈФ СИТИ Возачите почнаа да бараат друг пат кон Србија
Пелинце - Прохор Пчински повторно во фокусот, но засега нема официјална потврда за масовно пренасочување.
Воведувањето на системот „Сејф сити“ и засилената контрола на неплатените сообраќајни казни отвораат нови прашања за возачите кои од Македонија патуваат кон Србија.
Во јавноста се појавија информации дека дел од возачите кои имаат неплатени казни го избираат граничниот премин Пелинце – Прохор Пчински наместо Табановце, во обид да избегнат подолги проверки или дополнителни процедури поврзани со нивните обврски.
На Табановце во изминатиот период се регистрирани проверки поврзани со неплатени сообраќајни прекршоци, особено кај возила со странски регистарски таблички.
Пелинце – Прохор Пчински е вториот патен премин меѓу Македонија и Србија, но засега нема официјални податоци кои би потврдиле дека неплатените казни довеле до значително пренасочување на сообраќајот кон овој премин.
Со функционирањето на „Сејф сити“, евидентирањето и санкционирањето на сообраќајните прекршоци се одвива по дигитален пат, што овозможува поефикасна контрола. Возачите, вклучително и оние со странски таблички, при излез од земјата можат да бидат соочени со обврска за регулирање на неплатените казни.
