НЕМИРЕН ПОЧЕТОК ЗА МЕРЦ Стапува на функција по првичен шок во Бундестагот
Претходно во текот на денот, првиот круг од гласањето заврши без успех за Мерц, откако 310 пратеници го поддржаа , најмалку 18 помалку од очекуваното коалициско мнозинство, што отвори прашања за внатрешната стабилност и довербата во новиот владин состав.
Фридрих Мерц, кандидатот на Христијанско-демократската унија (CDU), е избран за нов канцелар на Германија откако успеа да обезбеди мнозинство во вториот круг од гласањето во Бундестагот, по неуспехот во првиот обид , настан без преседан во германската политичка историја.
Мерц доби 325 гласа, девет повеќе од потребното апсолутно мнозинство од 316.
„Почитуван претседателе на Бундестагот, го прифаќам изборот“, изјави тој по прогласувањето на резултатите.
Пратеничките групи на CDU/CSU и коалицискиот партнер Социјалдемократската партија на Германија (SPD) располагаат со вкупно 328 места во парламентот.
Претходно во текот на денот, првиот круг од гласањето заврши без успех за Мерц, откако 310 пратеници го поддржаа , најмалку 18 помалку од очекуваното коалициско мнозинство, што отвори прашања за внатрешната стабилност и довербата во новиот владин состав.
Мерц ќе ја прими официјалната потврда од претседателот Франк-Валтер Штајнмаер, по што се очекува новата влада предводена од CDU да положи заклетва пред парламентот.
Првите надворешнополитички чекори на Мерц како канцелар вклучуваат посети на Франција и Полска, веќе закажани за среда. Меѓутоа, аналитичарите предупредуваат дека слабата поддршка во првото гласање сигнализира тешкотии за коалицијата која најави амбициозна агенда за темелна реконструкција на државата.
