МОРАМ ДА СЕ ОЖЕНАМ ПРЕД ДА УМРАМ Рики Џервејс откри зошто по 40 години ќе стапне пред олтар
65-годишниот комичар призна дека не станува збор за романтика, туку за милионите што би можеле да бидат погодени од данокот на наследство.
Рики Џервејс откри дека по четири децении врска со Џејн Фалон сепак би можел да стапне пред олтар, но не поради романтика, туку поради данокот на наследство.
65-годишниот британски комичар, чие богатство се проценува на околу 141 милион фунти, во интервју за „Saga Magazine“ призна дека бракот со долгогодишната партнерка би бил единствено финансиска одлука.
На прашањето дали данокот е причината поради која би се оженил со Фалон, Џервејс одговорил потврдно.
„Да, тоа е. И тоа ќе биде единствената причина зошто се женам. Сè уште не сме го направиле тоа, но ако не беше данокот, која е поентата?“, изјавил комичарот.
Тој се пошегувал дека со Џејн ги делат сите пари и дека се заедно околу 40 години, па нивната врска, според него, веќе функционира како брак.
„Колку долго можеме да бидеме во брак? Ги делиме сите пари, заедно сме 40 години. Некои бракови не траат ниту една година“, рекол Џервејс.
Бракот како заштита од висок данок
Причината за неговата одлука е британскиот данок на наследство. Невенчаните партнери немаат исто автоматско ослободување како брачните парови, па наследството над законскиот праг може да биде оданочено со стапка од 40 проценти. Со оглед на имотот на Џервејс, потенцијалниот даночен трошок би можел да биде огромен.
Комичарот поседува повеќе вредни недвижности, меѓу кои куќа со девет спални соби во лондонски Хемпстед, проценета на 14,75 милиони фунти, два стана во Њујорк и имот покрај реката во Марлоу. Таму неодамна добил дозвола и за изградба на нова куќа вредна околу пет милиони фунти, со луксузни простории, домашна теретана, галерија, лифт и голема спална соба со тераса.
„Морам да се оженам пред да умрам“, се пошегувал Џервејс.
Заедно од 1982 година, без брак и деца
Џервејс и Фалон се запознале во 1982 година, додека студирале на Универзитетскиот колеџ во Лондон. Две години подоцна започнале да живеат заедно, а во текот на четирите децении врска свесно одлучиле да не се венчаат и да немаат деца. Фалон во повеќе наврати зборувала за својата одлука, нагласувајќи дека никогаш не сонувала за свадба или мајчинство и дека отсекогаш била повеќе фокусирана на кариерата и сопствениот живот.
Само неколку месеци откако Џервејс зборува за можниот брак, Фалон се соочува со сериозен здравствен предизвик. Кај неа бил откриен рак на дојка во рана фаза за време на рутинска мамографија во март. По операцијата и дополнителната процедура, таа објави охрабрувачки вести за своето лекување.
И покрај тоа што никогаш не ја прифатиле формалната институција на бракот, Џервејс со години тврди дека тој и Фалон во суштина веќе се како брачна двојка. Според него, нивниот „лажен брак“ траел подолго од многу вистински бракови а сега даночните правила би можеле да бидат причината поради која конечно ќе стане и формален.
