МИНИСТЕРОТ АЛИУ – Податоците ќе се движат со пациентот, не пациентот со податоците

Министерот за здравство, Азир Алиу, на отворањето на Саемот за медицина, стоматологија и фармација – Health Innovation Expo 2025 во Скопје, порача дека здравствениот систем на 21-от век се гради со податоци, дигитализација и предвидување, а не само со ѕидови и апарати.

„Податоците треба да се движат со пациентот, а не пациентот со податоците. Лекарите ќе имаат моментална и точна слика на здравствената историја на секој пациент, а пациентите ќе можат да ги следат сите свои податоци сами“, истакна Алиу.

Министерот нагласи дека дигитализацијата е темел за еднакво и достапно здравство и овозможува телемедицина и следење на хронични заболувања во реално време.

Од минатиот месец, рече Алиу, сите приватни болници се задолжени да ги отворат своите бази и да овозможат пристап до податоците за третман преку системот „Мој термин“, без разлика дали пациентот плаќа од свој џеб или не.

Тој додаде дека користењето на дигитални протоколи, вештачка интелигенција и алгоритми овозможува рано откривање на здравствени ризици, помалку чекање, помалку непотребни хоспитализации и повеќе грижа за пациентите.

„Работиме на национално електронско досие за секој граѓанин и интеграција на сите здравствени установи и сервиси во државата, со цел стандардизација, професионализам и навремена грижа за пациентите“, заклучи министерот.