МИЦКОСКИ НАЈАВУВА ГОЛЕМИ ИНВЕСТИЦИИ ЗА ПОПОВА ШАПКА – Ќе стане врвен туристички центар

Премиерот Христијан Мицкоски потврди дека Владата води преговори со инвеститори за развој на туристичкиот центар „Попова Шапка“, со цел центарот да се позиционира како еден од најголемите и најмодерни во Европа.

„На вистинскиот пат сме. Не можам да кажам дека сите детали се веќе финализирани, но имаме сериозен инвеститор и сум оптимист дека ќе ја постигнеме целта – Попова Шапка да стане најубав туристички центар во регионот“, рече Мицкоски.

Тој нагласи дека се планираат значителни инвестиции и се развива поширок концепт за центарот, со повеќе скијачки патеки отколку што имаат многу големи алпски центри.

Дел од планот е и изградба на нова жичарница од Тетово до Попова Шапка, која ќе овозможи функционирање на центарот цела година, а не само во зимската сезона.

„Од меѓународниот аеродром, за 45 минути ќе може да се стигне директно до пистата со скијачки чизми. Се работи за нова траса на жичарницата, а деталите ќе ги соопштиме подоцна, додаде Мицкоски.

Според неофицијални информации инвеститорот за кој зборува премиерот е од Катар, што е различно од претходните најави за италијанската компанија „Алпин“, промовирана од минатата влада.