МАСАКР ВО СРЦЕТО НА ЊУЈОРК: Четворица мртви, напаѓачот се самоубил на 33-ти кат

Њујорк повторно беше потресен од брутален чин на насилство, откако вчера во 18 часот по локално време, маж вооружен со автоматска пушка М4 излегол од црн автомобил и започнал вооружен напад во центарот на градот. Напаѓачот без предупредување влегол во деловната зграда на Парк Авенју 345 и веднаш отворил оган врз полицаец кој се наоѓал во лобито.

Во зградата, која е дом на некои од највлијателните компании во САД – меѓу кои финансискиот гигант Blackstone, ревизорската компанија KPMG и седиштето на Главната лига фудбал (MLS) – завладеала паника. Напаѓачот продолжил да пука на повеќе локации низ зградата, при што, според полициските извештаи, животот го загубиле четири лица, вклучувајќи го и нападнатиот полицаец. Уште четворица – тројца мажи и една жена – се во критична состојба и се борат за живот.

Градоначалникот на Њујорк, Ерик Адамс, го опиша нападот како „чин на лудо насилство“ и рече дека градот повторно е соочен со страшна реалност. „Ова е напад врз мирот, безбедноста и самото срце на нашиот град,“ изјави тој на итна прес-конференција.

Безбедносните камери го снимиле напаѓачот во самиот почеток на нападот, а според податоците од истрагата, се верува дека тој се самоубил на 33-тиот кат од зградата. Целата област беше веднаш блокирана, десетици амбулантни возила и специјални единици пристигнаа за неколку минути, додека хеликоптери надлетуваа над Менхетен.

Инцидентот се случи само неколку блока од Централ Парк, во елитен кварт познат по луксузни хотели и корпоративни седишта. Случајот предизвика шок и страв низ целиот град, и отвори нова дебата за контролата на оружјето и безбедноста во јавните простори. Истрагата е во тек, а властите сè уште не го откриваат идентитетот на напаѓачот ниту можните мотиви зад нападот.