МАКЕДОНИЈА ПРИСТИГНА ВО ДАНСКА Лазаров ги поштеди играчите по долгото патување

Ракометната репрезентација на Македонија од вчера се наоѓа во Силкеборг, Данска. Иако првиот тренинг беше предвиден за попладневните часови, селекторот Кирил Лазаров и стручниот штаб одлучија да ги поштедат играчите поради напорното патување, па тимот доби време за одмор и аклиматизација.

Сепак, веќе денеска македонските ракометари продолжуваат со подготовките со два тренинга. Првиот е фитнес во теретана, додека попладне ќе тренираат во сала.

Македонија ќе има уште неколку денови за подготовки пред Европското првенство, а пред почетокот е планиран и еден неофицијален тест натпревар против машката екипа на Мидтјиланд.

Првенството ќе започне на 16 јануари со дуел против ко-домаќинот Данска, еден од главните фаворити за златото. Следуваат натпреварите со Португалија на 18 јануари и со Романија на 20 јануари.

Целта на Македонија е да се пласира меѓу првите две селекции во групата и да обезбеди место во втората, главна фаза на првенството.