КАДЕ БИЛО, КОГА БИЛО, ИСТАНБУЛ, ВАТИКАН, ШВАЈЦАРИЈА Зеленски подготвен за директна средба со Путин
По завршувањето на разговорите, двете страни постигнаа договор за размена на сите тешко повредени и тешко болни воени заробеници, како и млади војници на возраст од 18 до 25 години, според принципот „сите за сите“.
Украинскиот претседател Володимир Зеленски изрази подготвеност веднаш да се сретне со рускиот претседател Владимир Путин, со цел постигнување прекин на огнот и завршување на војната во Украина.
Во обраќање пред медиумите, Зеленски нагласи дека украинската страна е подготвена за дијалог на највисоко ниво и предложи неколку можни локации за одржување на средбата, меѓу кои Истанбул, Ватикан и Швајцарија.
„Русите не се подготвени за прекин на огнот. Велат дека тоа не е прашање за делегациите, туку за самите лидери. Ние сме подготвени за состанок веднаш. Местото на средбата нека го изберат тие – Истанбул, Ватикан, Швајцарија – сите се прифатливи. Во понеделник или кој било друг ден“, изјави Зеленски, пренесува украинската новинска агенција Укринформ.
Изјавата доаѓа по втората рунда преговори меѓу руската и украинската делегација, која се одржа во понеделник во палатата Чираган во Истанбул и траеше повеќе од еден час.
По завршувањето на разговорите, двете страни постигнаа договор за размена на сите тешко повредени и тешко болни воени заробеници, како и млади војници на возраст од 18 до 25 години, според принципот „сите за сите“. Дополнително, договорена е и размена на телата на околу 6.000 загинати војници.
Киев официјално предложи одржување на лидерска средба до крајот на месецот, со надеж дека директниот дијалог ќе придонесе кон трајно политичко решение и ставање крај на конфликтот.
