ИЗМЕНИ НА СООБРАЌАЈОТ НА ПАТОТ А1 И ЗАБРАНИ ЗА КАМИОНИ Повеќе делници со пренасочувања, засилен сообраќај поради летните одмори

Од 4 август започнува временa изменa на режимот на сообраќај на експресниот пат А1, на делницата Градско – Дреново, како дел од реализацијата на проектот за изградба на нова патна делница во рамки на Коридорот 10д. Според најавите, сообраќајот на овој потег ќе биде пренасочуван и регулиран со соодветна сигнализација сè до 16 септември 2025 година.

Во меѓувреме, поради градежни активности на вијадуктот Сарички Дол, кој се наоѓа на државниот пат А1, делница Градско – Прилеп (обиколница на Прилеп), сообраќајот на патниот правец од бензинската пумпа „Лукоил“ до клучката кај „Салида“ ќе биде целосно затворен од 3 август во 07:00 часот до 6 август. За тој период, возилата ќе се пренасочуваат низ градот Прилеп.

Во делот на тековната состојба, сообраќајот на државните патишта се одвива непречено, на суви коловози. Сепак, поради зголемениот број патувања, интензитетот на сообраќајот надвор од градските средини е значително зголемен. На граничниот премин Табановце, чекањето за влез во државата се движи околу 30 минути, додека на другите премини не се бележат подолги задржувања.

Авто-мото сојузот на Македонија апелира до возачите да возат внимателно, со прилагодена брзина и да ја почитуваат поставената сигнализација, особено на делниците низ клисури и долини, каде има ризик од одрони. Посебна претпазливост се препорачува за делниците Катланово – Велес, Маврово – Дебар – Струга, Виница – Берово и Кочани – Делчево.

Во сила е и летниот времен режим за тешки товарни возила со вкупна маса над 15 тони, кој се применува од 1 јули до 31 август. Забраната важи за време на викендите и при екстремно високи температури, во следниве термини:

• Петок од 17:00 до 22:00 часот,
• Сабота од 09:00 до 18:00 часот,
• Недела од 09:00 до 22:00 часот.

Во денови со екстремна жештина (определени од Министерството за здравство), забраната се проширува и од понеделник до четврток од 11:00 до 17:00 часот. Исклучоци се прават за возила што превезуваат животни, хуманитарна помош, храна, нафта, опасни материјали или се ангажирани на проекти на ЈП за државни патишта.

Дополнително, на магистралниот пат А2 (Скопје – Охрид – Скопје), важи посебна забрана за тешки возила над 7,5 тони во период до 1 септември:

• Петок од 15:00 до 22:00 часот,
• Сабота од 07:00 до 12:00 и од 18:00 до 24:00 часот,
• Недела од 07:00 до 22:00 часот.

Возачите се повикуваат на внимателност и навремено планирање на патувањата.