ИВА ВО ПИРОГОВ Софија ќе ја штити и ќе истражува како ја поминала границата
Бугарскиот министер најави сослушување и проверка на сите околности по заминувањето на Михајлова од Македонија, каде против неа се води судска постапка за сообраќајна несреќа со смртни последици.
Министерот за внатрешни работи на Бугарија, Иван Демерџиев, денеска изјави дека на Ива Михајлова ќе ѝ биде доделено обезбедување доколку се утврди дека ѝ е потребно. Михајлова се наоѓа во болницата „Пирогов“ во Софија, откако вчера ја напушти Македонија, каде против неа се води судска постапка за сообраќајна несреќа со смртни последици.
„Известен сум дека таа и нејзиниот адвокат се наоѓаат во ‘Пирогов’. Ќе се преземат чекори за нејзино сослушување и за утврдување кога, каде и како ја преминала границата. Ќе ги испитаме и сите други околности, вклучително и дали им е потребна безбедност. Доколку постои таква потреба, ќе биде доделена заштита“, изјави Демерџиев.
Во реакција на случајот, Министерството за надворешни работи и надворешна трговија на Македонија оцени дека постапувањето на бугарските институции и приемот на Михајлова во Софија испраќаат погрешна порака и ги поткопуваат напорите за градење доверба и унапредување на добрососедските односи.
Случајот сега отвора пошироки прашања за соработката меѓу македонските и бугарските институции, постапувањето при преминување на државната граница и почитувањето на судските одлуки, во услови кога Македонија очекува од соседна Бугарија да ги почитува принципите на владеење на правото и добрососедските односи.
