ХРИСОС СЕ РОДИ – НАВИСТИНА СЕ РОДИ Македонија го слави Божиќ
Со божиќни литургии во сите храмови на МПЦ одбележано Рождеството Христово, централно во Соборниот храм „Св. Климент Охридски“ во Скопје
Христијанските верници денеска го одбележуваат еден од најголемите христијански празници – Божиќ, денот на раѓањето на Исус Христос, кој ја симболизира победата на светлината, мирот, љубовта и надежта.
Во сите храмови на Македонската православна црква утрово се служеа свечени божиќни литургии, а централното одбележување се одржа во Соборниот храм „Свети Климент Охридски“ во Скопје.
Со традиционалниот празничен поздрав „Христос се роди – навистина се роди“, верниците го прославија Рождеството Христово – Божиќ. На божиќната богослужба присуствуваа бројни верници, како и претставници на државниот врв.
По повод големиот празник, архиепископот охридски и македонски г.г. Стефан, заедно со Светиот архиерејски синод на Македонската православна црква – Охридска архиепископија, упати Божиќно послание до свештенослужителите, монаштвото и до сите верници, во кое им посака мир, здравје и Божји благослов, честитајќи го празникот со торжествениот поздрав – Христос се роди.
