ХЕРОИТЕ НЕ СЕ ВОЈСКОВОДЦИТЕ, ТУКУ ДОБРИТЕ ЛУЃЕ Филмот за Кочани вечерва ќе ја потресе Македонија
„Добри луѓе“ на Милчо Манчевски по Сараево стигнува и пред домашната публика, а билетите за премиерата во Куршумли ан се распродадени.
Документарниот филм „Добри луѓе“ на режисерот Милчо Манчевски вечерва ќе ја има македонската премиера на Фестивалот на креативен документарен филм „МакеДокс“. Проекцијата е закажана за 21 часот во Куршумли ан, а билетите се веќе распродадени.
Филмот ја раскажува трагедијата во Кочани преку личните сведоштва на луѓето чии животи засекогаш се промениле по пожарот во дискотеката „Пулс“ на 16 март 2025 година, во кој загинаа 63 лица. Во документарецот зборуваат преживеани, членови на семејствата на загинатите, како и луѓе кои во кобната ноќ се обидувале да помогнат и да спасат животи.
Манчевски го снимал филмот со мала екипа, само еден месец по трагедијата. Наместо реконструкција на настаните или дистанцирано објаснување на причините, режисерот се фокусира на луѓето и нивните сеќавања, оставајќи нивните сведоштва сами да ја пренесат тежината на загубата.
„Хероите не се војсководците, туку добрите луѓе“, вели Манчевски, објаснувајќи ја идејата зад насловот на филмот.
Светската премиера на „Добри луѓе“ се одржа на 16 август во официјалната документарна конкуренција на 32. Сараевски филмски фестивал. По проекцијата, во салата следувала долга тишина, а потоа и аплауз. Манчевски изјави дека во таа тишина ја почувствувал тагата на Кочани, која, според него, ја препознала и публиката во Сараево.
Документарецот се издвојува со воздржан пристап и отсуство на драматизација. Камерата останува со соговорниците, додека нивните лични приказни и сведоштва ја носат целата тежина на филмот.
По фестивалското прикажување во „МакеДокс“, „Добри луѓе“ од 26 август ќе може да се гледа и во скопскиот „Синеплекс“. Целиот приход од билетите од овие проекции ќе биде дониран преку „Сапорт Кочани“ за помош на лицата погодени од трагедијата.
Манчевски го реализирал филмот со сопствени средства, без финансиско учество на Агенцијата за филм. Во неговиот фокус не се институциите и политичките толкувања, туку луѓето – оние кои преживеале, оние кои изгубиле најблиски и оние кои во најтешкиот момент избрале да помогнат.
Вечерва, под сводовите на Куршумли ан, нивните гласови за првпат ќе стигнат до македонската фестивалска публика.
