ГЛУМЦИТЕ ПЕАТ ГО ЗАПАЛИ СКОПЈЕ – Емилија Мицевска настапи со труднички стомак и ги воодушеви сите

Во срцето на Скопје, на сцената на Македонскиот народен театар, повторно оживеа едно од најомилените културни случувања „Глумците пеат“. Со повеќе од 50 уметници на сцената, ова издание уште еднаш потврди дека кога театарот и музиката се спојуваат, резултатот е вистинска сценска магија.

Програмата оваа година беше посветена на македонската музика и безвременски хитови кои публиката ги знае наизуст, но овојпат добија сосема ново, лично толкување. Секој настап раскажуваше уникатна приказна, полна со емоција, креативност и автентичен печат.

Двете вечери публиката уживаше во моменти кои ќе останат долго во сеќавање. Емилија Мицевска привлече особено внимание со својот настап, појавувајќи се со труднички стомак и симболично спојување на уметноста и животот и беше наградена со громогласен аплауз. Посебна емоција внесе и Рубенс Муратовски, кој настапи заедно со синовите, создавајќи магичен спој на младешка енергија и сценско искуство.

Многу смеа предизвика Тања Кочовска, која, иако не беше меѓу настапувачите, спонтано „упадна“ од балконот и се придружи на колегите на сцената, раздвижувајќи ја целата сала со својот препознатлив хумор и позитивна енергија.

Под режија на Дејан Пројковски и со музичка поддршка од оркестарот на маестро Љупчо Мирковски и аранжманите на Бобан Мирковски, сцената пулсираше со динамика и страст. Покрај веќе етаблираните актери, блеснаа и нови таленти: Владимир Петровиќ, Григор Јовановски, Стефан Спасов, Денис Абдула, Анастасија Трајковска и Катерина Јовановиќ, кои заедно со Игор Ангелов, Рубенс Муратовски, Весна Петрушевска и Наталија Теодосиева создадоа вечери полни со музика, харизма и талент.

Целокупното доживување беше надополнето со впечатлива костимографија, разиграна кореографија и хумор во најавите, кои ја одржуваа атмосферата жива и блиска до публиката.

„Глумците пеат“ не е само претстава и тоа е традиција што продолжува да живее. Создадено од Марин Бабиќ, денес шоуто го негуваат неговите ќерки, Маја и Ира, кои со посветеност го одржуваат уникатниот формат. И оваа година, шоуто уште еднаш докажа дека вистинската уметност не старее и таа постојано се обновува, носејќи нови приказни, гласови и емоции.