ФИЛИПЧЕ СО ПРОМЕНИ ВО ТИМОТ Централниот одбор на СДСМ го редефинираше раководството

Централниот одбор на СДСМ на вечерашната седница го избра новото партиско раководство, со промени во структурата и бројот на функциите.

Наместо досегашните четворица, партијата отсега ќе има двајца потпретседатели. На тие позиции се избрани пратеничката и поранешна министерка за труд и социјална политика Јована Тренчевска и лекарот Александар Трајановски, поранешен кандидат за градоначалник на општина Аеродром. Двајцата се предложени од партискиот лидер Венко Филипче.

На функцијата генерален секретар останува Александар Димитриевиќ, додека Љупчо Фармаковски повторно е избран за организациски секретар. Во раководството се враќа и поранешната потпретседателка Ана Чупевска, која ќе го предводи новоформираниот совет на партијата.

Поранешниот член на Антимонополската комисија, Александар Давчевски, е избран за претседател на Градската организација на СДСМ. Во Извршниот одбор остануваат Андреј Жерновски, Агрон Демири и Симона Цветановски, а меѓу новоизбраните членови е и поранешниот градоначалник на Ѓорче Петров, Александар Наумовски.

По предлог на Филипче, за членови на Извршниот одбор се избрани и Рената Младеновска, Дејан Николовски, Јон Фрчкоски, Наташа Попоска, Петар Огњеновиќ, Андреј Бислимовски и Филип Андов.

Фани Каранфиловска-Пановска ќе продолжи да ја извршува функцијата заменик-претседателка, бидејќи таа е избрана на партиски конгрес, а нејзината оставка може да биде констатирана исклучиво на таков форум.