ЕСКАЛАЦИЈА НА ПРОТЕСТИТЕ ВО СРБИЈА – Судири меѓу поддржувачи на власта и антивладини демонстранти
Студентите кои го блокираа градот ја обвинија власта дека сакала да предизвика граѓанска војна.
Синоќа во Нови Сад дојде до тешки судири меѓу поддржувачите на владејачката Српска напредна партија (СНС) и антивладините демонстранти, откако кон протестниот собир беа фрлани факели и петарди, што ја принуди полицијата да интервенира. Студентите кои го блокираа градот ја обвинија власта дека сакала да предизвика граѓанска војна.
Претседателот Александар Вучиќ соопшти дека се повредени 16 полицајци и околу 80 поддржувачи на СНС, обвинувајќи „странски сили“ за организирање на нередите и најави апсења.
Снимки од телевизијата „Н1“ покажаа факели и петарди фрлани од правец на канцелариите на СНС, како и демонстранти со повреди кои тврдат дека биле нападнати со стапови и палки. За време на инцидентите, офицер од српската војска испукал пиштол во воздух, за што министерот за внатрешни работи Ивица Дачиќ потврди дека бил на службена должност.
Судири имаше и во Белград, каде полицијата спречи демонстрантите да се приближат до седиштето на СНС. Опозицијата ги обвини поддржувачите на Вучиќ за насилствата.
