ДРОНОВИ, ЕКСПЛОЗИИ И ОБВИНУВАЊА Ново ескалирање меѓу Русија и Украина

Претседателот Владимир Путин, кој досега не се огласуваше, наредил одмазднички мерки по, како што го нарече, смртоносниот украински напад врз студентски дом во окупираниот град Старобилск, во кој, според руските власти, загинале најмалку 18 лица. Путин го опиша нападот со беспилотно летало, извршен вчера во окупираниот регион Луганск, како „терористички чин“ и побара од Министерството за одбрана да подготви предлози за одговор.

Руската државна агенција ТАСС денеска објави дека бројот на жртви се искачил на 18, повикувајќи се на Министерството за вонредни ситуации и тврдејќи дека меѓу загинатите има и деца. Според истите извори, се верува дека уште три лица се затрупани под урнатините.

„Еден од штабовите на единицата ‘Рубикон’ во областа на Старобилск“, се наведува во дел од извештаите.

Украинската армија, пак, ги отфрли овие тврдења и ги обвини руските медиуми за ширење дезинформации. Киев повтори дека нивните напади се насочени исклучиво кон „воена инфраструктура и објекти што се користат за воени цели“, наведувајќи дека една од погодените локации во петокот била штаб на единицата „Рубикон“ во регионот Старобилск.

Станува збор за елитен центар за напредни дрон-технологии, основан во 2024 година, кој се смета за еден од водечките руски капацитети за развој на беспилотни системи и технологија за водење.

„Целта беше комплекс во кој беа сместени беспилотни летала, експлозиви и команден центар“, соопштија украинските извори.

Овој развој доаѓа во период кога Украина ги интензивира нападите со дронови на голема далечина, користејќи сè поширок арсенал за удари врз руска воена и енергетска инфраструктура. Киев во текот на неделата објави неколку значајни операции.

Според командантот на украинските сили за беспилотни системи, Роберт Бровди, камп за обука на руски оператори со дронови во Снижње бил погоден во средата навечер. Тој тврди дека во нападот загинале најмалку 65 кадети и инструктори, а целта бил комплекс од 2.484 квадратни метри со опрема, експлозиви и команден центар.

Овие тврдења биле поткрепени со снимки објавени на социјалните мрежи на кои се гледа пожар во објектот, кој CNN го геолоцираше во близина на кампот за обука. Украинскиот претседател Володимир Зеленски исто така изјави дека друг напад погодил седиште на руската безбедносна служба и систем за противвоздушна одбрана во регионот Херсон, при што, според него, биле убиени и ранети речиси 100 руски војници.

Сепак, треба да се нагласи дека ваквите украински тврдења за голем број жртви не се независно потврдени. CNN, која контактирала со руските власти, наведува дека не може самостојно да ги потврди обвинувањата.

Во меѓувреме, украинскиот претседател соопшти и за напад длабоко на руска територија, на околу 1.700 километри, при што, според него, е погодено важно воено-индустриско претпријатие. Тој прецизираше дека станува збор за хемиска фабрика во регионот Перм, која ја снабдува руската армија, а објави и видео на кое се гледа чад што се издига од објектот.