ДЕСЕТ ГОДИНИ ОД КУМАНОВСКО ДИВО НАСЕЉЕ Сеќавање на хероите што ги загубивме

Денес се одбележуваат десет години од трагичните настани во кумановската населба „Диво насеље“, каде што на 9 и 10 мај 2015 година се одвиваше една од најтешките безбедносни кризи во поновата историја на државата. Во 28-часовните престрелки животот го загубија осум припадници на безбедносните сили, а уште 37 беа повредени.

Загинаа Љубиша Аранѓеловиќ, Бобан Ивановиќ, Горан Илијевски, Жарко Кузмановски, Исамедин Османи, Сашо Самојловски, Ненад Серафимовски и Горан Стојменовиќ – сите посмртно одликувани со медали за храброст за нивната пожртвуваност во извршување на службените должности.

Во знак на сеќавање и благодарност, во кругот на Секторот за внатрешни работи Куманово беше откриена спомен-плоча посветена на загинатите. Во центарот на Куманово, пак, беше изработен и мурал со натпис „Хероите живеат вечно“, кој симболично ги овековечува нивните имиња и нивната жртва.

Двата дена на инцидентот Куманово живееше во неизвесност и страв. Населбата „Тоде Мендол“, позната како „Диво насеље“, беше целосно изолирана од безбедносните сили. Се слушаа истрели со различен интензитет, жителите беа евакуирани, а над населбата патролираа хеликоптери.

Граѓаните на Куманово и денес апелираат трагедијата од „Диво насеље“ никогаш да не се повтори. Овој настан останува длабоко врежан во колективното сеќавање на градот како симбол на жртвата, но и на потребата од траен мир и стабилност.