ДАЛИ НЕТАНЈАХУ БАРА ПОВОД ЗА ВОЈНА СО ТЕХЕРАН: Само целосно уништување на нуклеарната инфраструктура на Иран е прифатлив договор

Израелскиот премиер Бенјамин Нетанјаху изјави дека секој договор со Иран мора да предвиди целосно уништување на иранската нуклеарна инфраструктура и елиминација на способноста на Техеран да збогатува ураниум.

„Договор што функционира е оној што ја отстранува способноста на Иран да збогатува ураниум за производство на нуклеарно оружје. Уништете ја целата инфраструктура на иранската нуклеарна програма – тоа е договор со кој можеме да живееме“, рече Нетанјаху на Конференцијата за политика во Ерусалим, пренесе „Тајмс оф Израел“.

Изјавата на Нетанјаху доаѓа по минатонеделното тврдење на американскиот државен секретар Марко Рубио дека Вашингтон работи на договор кој ќе ја спречи способноста на Иран да збогатува ураниум. Од иранска страна, заменик-министерот за надворешни работи Абас Арагчи порача дека прашањето за збогатувањето е „непреговарачко“.

Израелскиот премиер предупреди дека доколку биде постигнат поблаг договор, Иран ќе почека до завршување на мандатот на американскиот претседател Доналд Трамп за да ги продолжи своите активности. Тој исто така нагласи дека производството на ирански балистички ракети мора да биде вклучено во преговорите.

Меѓутоа, портпаролот на иранското Министерство за надворешни работи изјави во саботата, по последната рунда преговори, дека „прашањето за одбранбените способности и ракетите не е на дневен ред и не беше покренато во индиректните разговори“.