ЦРНИ ПРОГНОЗИ ЗА БИТКОИНТОТ – Крах на криптовалутата и разорни последици

Познатиот инвестициски стратег Мајкл Бери, кој стана светски познат по облогот против американскиот пазар на недвижности пред финансиската криза во 2008 година, предупреди дека падот на биткоинот може да се продлабочи во „спирала на смртта“. Тој посочи дека тоа може да нанесе трајна штета на компаниите кои во последната година акумулирале оваа криптовалута.

Во објава на платформата Substack, Бери наведе дека биткоинот, кој од октомврискиот врв изгуби околу 40% од вредноста, сега се гледа како исклучиво шпекулативен имот. Тој не успеал да се афирмира како заштита од девалвација на парите, како што тоа го прават благородните метали. Натамошните падови би можеле да ја оптоварат финансиската положба на најголемите сопственици, да предизвикаат принудни продажби низ криптоекосистемот и да започнат широка деструкција на вредноста.

„Сите одбивни сценарија сега се реални“, напиша Бери.

Според него, ако биткоинот падне уште за 10%, најголемата корпоративна криптотрезорска компанија, Strategy Inc., ќе има загуби од повеќе милијарди долари и ќе остане практично без пристап до пазарите на капитал. Дополнителни падови би можеле да ги доведат и рударите на биткоин до банкрот.

Во вторникот биткоинот падна под 73.000 долари, што е најниско ниво од враќањето на Доналд Трамп во Белата куќа пред нешто повеќе од една година. Аналитичарите посочуваат различни причини за падот, од намалување на приливот на капитал, преку влошување на ликвидноста, до поширока макроекономска несигурност.

За разлика од златото и среброто, кои забележаа раст додека глобалните тензии ги зголемија стравувањата од девалвација на доларот, биткоинот не реагираше на обичните поттикнувачи како ослабувањето на доларот или геополитичките ризици.

„Не постои оправдана причина биткоинот да забави или запре со падот“, пишува Бери.

Според него, прифаќањето на биткоинот од страна на корпоративните трезори и новите спот ЕТФ-ови не е доволно за долгорочна поддршка на цената, ниту за да се спречат разорни последици во случај на стрмен пад. Околу 200 јавни компании поседуваат биткоин, но трезорските средства се вреднуваат по пазарна вредност и мора да се вклучат во финансиското известување. Падот на цената може да ги принуди менаџерите за ризици да советуваат продажба.

Поради појавата на спот ЕТФ-ови, биткоинот станува уште повеќе шпекулативен и се зголемува неговата корелација со берзите на акции, приближувајќи се на 0,50 со индексот S&P 500. Тоа значи дека принудните ликвидирања можат да се активираат кога загубите во позициите ќе растат.

Иако криптопазарот сè уште е премал за да предизвика широка зараза, падот на биткоинот може да влијае на пошироките пазари. Бери укажува дека корпоративните трезори и шпекулантите морале да го намалат ризикот преку продажба на профитабилни позиции во токенизирани фјучерси на злато и сребро, што доведува до „колатерална спирала на смртта“.

„До крајот на месецот, како последица на падот на криптовалутите, може да бидат ликвидирани и до милијарда долари во благородни метали“, пишува Бери.

Ако биткоинот падне на 50.000 долари, рударите би банкротирале, а токенизираните фјучерси на метали би останале без купувачи.