БИТОЛЧАНИ СЛАВАТ Еурофарм Пелистер повторно шампион на Македонија

Еурофарм Пелистер ја одбрани шампионската титула, откако вечерва во Скопје го совлада тимот на Вардар со резултат 32:30. Со оваа победа, битолскиот тим стигна до својот деветти трофеј во историјата, а трет по ред.

Натпреварот беше возбудлив – првото полувреме му припадна на Вардар, кој водеше со 17:15 и имаше предност од пет гола (15:10). Но, во вториот дел Еурофарм Пелистер се врати посилен, со поагресивна одбрана и организиран напад, што им овозможи целосен пресврт и конечна победа.

Филип Кузмановски беше најефикасен кај победниците, додека кај Вардар се истакна Вуко Борозан со осум постигнати голови.

Новиот трофеј е потврда на доминацијата на Еурофарм Пелистер во македонскиот ракомет, а беше освоен во арената „Борис Трајковски“ во Скопје.