АГЕЛЕР: ВАШАТА ЗЕМЈА Е МАГИЧНА – Ние во Америка секогаш ќе бидеме со вас

По три години поминати во Скопје, американската амбасадорка Ангела Агелер се прости од македонската јавност со отворено писмо во кое таа испрати јасна порака: поддршката од Соединетите Американски Држави останува цврста, а вербата во граѓаните на Македонија непоколеблива.

Агелер пристигна во земјата како десетта амбасадорка на САД со чувство на голема чест и одговорност. Верата што ја изразила уште на почетокот на мандатот не само што не ослабнала, туку со текот на времето станала уште посилна и потврдена преку средбите, разговорите и искуствата со луѓето низ целата држава.

Во освртот на изминатите три години, таа призна дека сликата е сложена: во некои области има видлив напредок, додека предизвиците во други остануваат отворени. Но токму во таа мешавина од успеси и недовршена работа, амбасадорката ја гледа реалната динамика на едно општество во развој.

Посебно внимание ѝ посвети на 2025 година, кога Македонија и САД одбележаа три децении дипломатски односи. Таа оцени дека партнерството донело конкретни и мерливи резултати од економијата и енергетската безбедност, преку судските реформи и инфраструктурните проекти, до образованието, заштитата на културното наследство и патот кон евроатлантските структури.

Но надвор од официјалните бројки и политики, највредниот дел од нејзината мисија за Амгер беше човечката страна. Патувањата низ земјата, посетите на училишта, цркви, судници и домови, како и искрените разговори со граѓаните и дури и кога ставовите биле спротивставени и оставиле најсилен впечаток.

Македонија, како што ја опишува Агелер, има нешто „магично“: спој на природна убавина, богата историја, традиции и култури, но и на противречности кои не ја слабат, туку ја зацврстуваат. Таа ја истакнува издржливоста и специфичниот хумор на луѓето, кои опстојуваат и покрај тешките предизвици и болните загуби.