ПОРАНЕШНИОТ ХРВАТСКИ ПРЕМИЕР САНАДЕР ИЗЛЕЗЕ ОД ЗАТВОР ПО 10 ГОДИНИ – Но ќе биде под надзор до 2032 година

Поранешниот премиер на Хрватска, Иво Санадер, денес излезе од затворот во Липовица, по повеќе од 10 години поминати зад решетки. Окружниот суд во Сисак донесе одлука за негово условно ослободување, наведувајќи дека причините се поврзани со неговото многу добро однесување за време на издржувањето на казната.

Санадер, кој беше лидер на ХДЗ, претходно беше осуден на единствена затворска казна од 18 години за повеќе кривични дела поврзани со финансиска злоупотреба. Тој ќе остане под условна казна до 2032 година.

Според неговиот адвокат Драган Црнковиќ, сите законски критериуми за условно ослободување се исполнети. Иако неговата возраст и здравствената состојба беа споменати во барањето, главниот аргумент бил фактот дека до 15 август 2023 година Санадер веќе имал отслужено половина од казната.

Во согласност со законските обврски, Санадер ќе мора секој месец да се јавува во полиција и нема да смее да го менува своето живеалиште без одобрение. Окружниот суд во Загреб сега ја презема надлежноста над неговиот случај, а евентуалната промена на адреса ќе мора да биде одобрена од судија.