ТРАМП ЈА ОТПУШТИ ШЕФИЦАТА НА БИРОТО ЗА СТАТИСТИКА Не му се допаднале последните податоци

Американски претседател Доналд Трамп во петокот ја отпушти комесарката на Бирото за статистика на трудот (БЛС), Ерика Мекентарфер, само неколку часа откако агенцијата објави извештај според кој растот на работните места во САД речиси целосно запрел.

Во своја објава на Truth Social, во која упати остри критики и кон претседателот на Федералните резерви, Џером Пауел, Трамп ја обвини Мекентарфер дека е „политички назначена личност која манипулира со податоците за вработеноста“.

Од Бирото за CNBC потврдија дека Мекентарфер е разрешена од должноста и дека нејзината позиција привремено ќе ја преземе заменик-комесарот Вилијам Виатровски.

Бирото за статистика на трудот е дел од американското Министерство за труд, на чие чело е Лори Чавез-ДеРемер, исто така назначена од Трамп.

Отпуштањето дојде истиот ден кога БЛС објави значително послаби бројки од очекуваните – во јули се регистрирани само 73.000 нови неземјоделски работни места. Покрај тоа, агенцијата направи ревизија на претходните два месеци, намалувајќи ги бројките за вкупно 258.000 вработувања, што претставува најголема надолна корекција од април 2020 година, на самиот почеток на пандемијата со Ковид. Со оваа ревизија, просечниот месечен раст за изминатите три месеци изнесува само 35.000 нови работни места.