25 ГОДИНИ НА КОНЦЕРТНИТЕ СЦЕНИ Огненка Герасимовска-Димитровска со јубилеен концерт во Скопје
Настапувала во Лондон, Виена, Рим и други европски музички центри, соработувала со Македонската филхармонија и освоила бројни меѓународни награди – сега со посебен концерт одбележува 25 години уметничка кариера.

Јубилејниот концерт ќе се одржи на 24 ноември 2026 година, со почеток во 20 часот, во Музејот на ВМРО во Скопје. Настанот е посветен на четврт век уметнички пат исполнет со солистички и камерни настапи, меѓународни соработки и посветеност на македонското музичко творештво.
Јубилејот претставува можност за средба со публиката и споделување на музиката што ја одбележува нејзината изведувачка кариера. Како гостинка, во изведба на четирирачно пијано, ќе настапи и пијанистката Викторија Митеска-Малезан.
Концертот се реализира со поддршка на Министерството за култура и туризам на Република Северна Македонија.
Огненка Герасимовска-Димитровска е македонска концертна пијанистка, педагог и истражувачка во областа на музичката интерпретација. Дипломските и магистерските студии по пијано ги завршила на Факултетот за музичка уметност во Скопје, во класата на професорот Борис Романов, со највисок просек и признание cum laude. Докторирала во областа на музичките уметности под менторство на проф. д-р Томе Манчев и професорот Волфганг Манц од Нирнберг.
Нејзината концертна дејност опфаќа бројни настапи во земјата и во странство, меѓу кои во Лондон, Рим, Виена, Истанбул, Леон, Хаг, Утрехт, Нирнберг и Белград. Настапувала на реномирани домашни фестивали, како „Охридско лето“, „Скопско лето“, „Интерфест Битола“, „Есенски музички свечености“ и „Денови на македонската музика“.
Како солистка соработувала со Македонската филхармонија и Истанбулскиот камерен оркестар, додека камерната музика зазема значајно место во нејзиниот репертоар и уметничките соработки.
Герасимовска-Димитровска е добитничка на повеќе домашни и меѓународни награди. Меѓу позначајните се првата награда на натпреварот „Николај Рубинштајн“ во Париз, лауреатското признание на натпреварот на ЕПТА во Осиек и третата награда на натпреварот „Карл Дрексл“ во Нирнберг. Прогласена е и за најдобар дипломиран студент на Универзитетот „Св. Кирил и Методиј“ во Скопје.
Покрај концертната кариера, таа активно се занимава со педагошка и научноистражувачка работа. По долгогодишниот ангажман во ДМБУЦ „Илија Николовски-Луј“ и на Факултетот за музичка уметност во Скопје, денес работи како доцент на Факултетот за образовни науки при Универзитетот „Гоце Делчев“ во Штип.
Авторка е на монографијата „Академик Властимир Николовски и неговиот концерт за пијано и оркестар“, како и на научни трудови посветени на музичката интерпретација, педагогијата и македонското музичко наследство. Јубилејниот концерт на 24 ноември ќе биде одбележување на 25 години посветеност на пијаното, музичката уметност и концертната сцена.

