MICROSOFT ТЕСТИРА НОВ „COPILOT MODE“ Вештачка интелигенција во Edge која сама резервира ресторани и споредува хотели

Компанијата Microsoft започна со тестирање на нов експериментален режим наречен „Copilot Mode“ во својот интернет прелистувач Edge. Станува збор за напредна AI-функција која му овозможува на Copilot да пристапи до сите отворени јазичиња на корисникот и да извршува задачи – од пребарувања, споредби на производи до правење резервации во ресторани, сè тоа додека четботот функционира во посебно јазиче.

Во однос на другите конкуренти, овој режим претставува чекор помеѓу ограничената AI-интеграција што Google ја тестира со Gemini во Chrome и агресивниот AI-пристап на прелистувачот Comet. Она што го издвојува Copilot е неговата способност со дозвола од корисникот да „гледа“ во сите отворени страници и автоматски да анализира понуди, резимира информации и помага при изборот на најсоодветна опција.

Edge Copilot исто така поддржува гласовна навигација, што овозможува пронаоѓање информации на веб-страници, отворање јазичиња и споредување производи без рачно пребарување. Дополнително, Microsoft планира да му овозможи на Copilot пристап до историјата и податоците за најава, што би овозможило асистентот автоматски да извршува резервации и други активности во име на корисникот.

Новите Copilot функции се дел од пошироката стратегија на Microsoft за проширување на својата AI-платформа во прелистувачот Edge, надградувајќи ја досегашната интеграција со Copilot Vision.