САД СО НАЈГОЛЕМА ВОЕНА ГАРАНЦИЈА ДОСЕГА Полска добива 4 милијарди долари за набавка на американска воена опрема

Соединетите Американски Држави официјално одобрија кредитна гаранција во висина од 4 милијарди долари за Полска, со цел олеснување на набавката на американска воена опрема. Одлуката доаѓа во контекст на зголемените безбедносни предизвици поради воениот конфликт во Украина и е дел од пошироките напори на Вашингтон за засилување на одбранбените капацитети на сојузниците во Источна Европа.

Варшава веќе неколку години спроведува интензивна модернизација на својата армија, потпишувајќи низа договори со САД и Јужна Кореја, и притоа инвестира рекордни средства во безбедносниот сектор.

Оваа година, Полска издвојува 4,7% од својот БДП за воени трошоци, што ја позиционира како една од земјите со највисоки одбранбени буџети во НАТО. Владата најавува дека и во следната година овој процент ќе продолжи да расте.

Во рамки на договорите, Полска досега набави американски хеликоптери “Апачи”, ракетни системи “Химарс” и напредни противвоздушни системи “Патриот”, позиционирајќи се како една од стратешки најсилните земји во регионот.

Кредитната гаранција од Вашингтон ќе овозможи Полска побрзо и поефикасно да ги реализира тековните и идните договори со американските производители на оружје, зајакнувајќи ја својата одбрана во време на растечки тензии во Источна Европа.