(ВИДЕО) ЗА СТРУГА МВР БАРАШЕ КАЗНИ, А ШТО ЌЕ НАПРАВИ СЕГА Ахмети го истакна албанското знаме без македонското
Лидерот на ДУИ го истакна албанското национално знаме на јарбол кај меморијалниот комплекс „Мајка Албанка“ во Зајас.

Лидерот на ДУИ, Али Ахмети, го подигна албанското национално знаме на јарбол кај меморијалниот комплекс „Мајка Албанка“ во Зајас, но на настанот покрај него не беше истакнато и државното знаме на Република Македонија. Чинот, организиран во пресрет на Денот на албанската азбука, беше претставен како израз на албанскиот идентитет, националната гордост и почитта кон историското и културното наследство.
Сепак, покрај политичката и симболичната порака, настанот отвора и конкретно правно прашање: дали ваквиот начин на истакнување на знамето е во согласност со Законот за употреба на знамињата на заедниците. Законот предвидува правила за употреба на знамињата на заедниците, вклучително и случаи во кои тие задолжително треба да бидат истакнати заедно со државното знаме на Република Македонија.
Истовремено, законската регулатива дозволува употреба на знамињата на заедниците во приватниот живот, како и на културни, спортски и други приредби организирани од припадниците на заедниците. Оттука, за оценка на конкретниот случај важно е да се утврди карактерот на настанот и дали се исполнети законските услови за задолжително истакнување на државното знаме.
Прашањето добива дополнителна тежина ако се има предвид постапувањето на институциите во сличен случај. Во декември 2025 година, Министерството за внатрешни работи побара поведување прекршочна постапка против Општина Струга и одговорно лице, откако за време на одбележувањето на Денот на албанското знаме не било истакнато македонското државно знаме.
Тогаш полицијата се повика на член 6 и на прекршочните одредби од Законот за употреба на знамињата на заедниците. Оттука, се наметнува прашањето дали МВР и другите надлежни институции ќе постапат и во случајот со настанот во Зајас или ќе има различен пристап кон истакнувањето на знамињата во зависност од организаторот.
Засега нема информација дека надлежните институции отвориле постапка или утврдиле евентуално прекршување на законот во врска со настанот на кој присуствуваше Али Ахмети.

