СЕДЛОСКИ ПО ДЕБАКЛОТ ОД СЛОВЕНИЈА Немаме крв, немаме трка, немаме желба – Македонија со шест порази и нула бодови

По новиот дебакл пред речиси празната Национална арена, селекторот Гоце Седлоски се извини за настапите на домашен терен, призна дека репрезентацијата игра без желба и најави дека допрва ќе се разговара за иднината.

СЕДЛОСКИ ПО ДЕБАКЛОТ ОД СЛОВЕНИЈА Немаме крв, немаме трка, немаме желба – Македонија со шест порази и нула бодови
Фото: Национал

Фудбалската репрезентација на Македонија го заврши настапот во групната фаза од Лигата на нации со нов пораз, овојпат од Словенија со 0:3 на Националната арена „Тодор Проески“ во Скопје. Шест натпревари, шест порази, ниту еден освоен бод и гол-разлика од катастрофални 1:15 Е биланс што најдобро ја отсликува есенската фудбалска реалност на македонската репрезентација.

Словенците ги постигнаа трите гола преку Данијел Штурм во 29. и 90+1. минута и Давид Зец во 67. минута. Македонија повторно изгледаше немоќно, без континуитет во играта и без конкретен одговор на противничката иницијатива. Она што дополнително загрижува е фактот што Словенија во моментов не е европска фудбалска велесила, но на теренот во Скопје изгледаше како да е неколку класи над македонската селекција.

По натпреварот, селекторот Гоце Седлоски не го криеше разочарувањето и отворено призна дека особено го загрижува пристапот на репрезентативците на домашен терен. Тој посочи дека Македонија на домашните натпревари игра без волја, желба и борбеност, без разлика на поставената тактика.

„За мене мечевите што ги игравме дома беа без волја, без желба… Сè е кажано. Само едно се прашувам. Зошто мечевите дома ги играме вака? Бездушно. Без разлика каква е тактиката, мораш сам да почувствуваш на терен што да правиш. Без трка, без желба, нема ништо. Им кажав да погледнат како тоа го прави Словенија“, изјави Седлоски.

Селекторот упати и извинување за настапите на репрезентацијата, признавајќи дека ситуацијата е сериозна.

„Се извинувам за овие мечеви. Многу време немаме победа. Разговаравме во соблекувалната. Мора да видиме. Ќе видиме. Да преспиеме. Што ќе биде понатаму, ќе видиме“, рече Седлоски.

На прашањето дали размислува за оставка, тој повторно ја истакна главната слабост што ја забележува кај тимот.

„Самите се прашуваме зошто е тоа така. Немаме крв, немаме трка. Реалноста е таа“, додаде селекторот.

На спротивната страна, селекторот на Словенија, Боштјан Цесар, имаше причина за задоволство. Неговите фудбалери ја исполнија целта, освоија три бода во Скопје и останаа во игра за пласман во повисокиот ранг на Лигата на нации. Цесар истакна дека неговите избраници ги искористиле слабостите на Македонија и успешно го спровеле договореното пред натпреварот.

„Одигравме добар меч, го постигнавме тоа што го сакавме и секако дека сум задоволен. Сите играчи одиграа како што се договоривме. Ги знаевме слабите точки на Македонија и не дозволивме да доминираат на теренот. Резултатот е одличен, успеавме да се пласираме во дополнителните квалификации, што беше нашата цел пред средбата“, изјави Цесар.

Словенечкиот селектор му упати честитки и на македонскиот тим и на својот пријател Гоце Седлоски.

Македонија во претходниот циклус избори пласман во Лига Б, но соочувањето со посилната конкуренција ја откри длабочината на проблемите во националниот тим. Во шесте натпревари македонската репрезентација претрпе порази од Швајцарија, Словенија и Шкотска, а единствениот погодок го постигна во поразот од 2:1 на гостувањето кај Шкотска.

Со последното место во групата, Македонија ќе мора преку бараж да го брани статусот во Лига Б. Според форматот на УЕФА, противник ќе биде второпласирана репрезентација од Лига Ц, а натпреварите се предвидени за март 2027 година.

По шест порази, селекторот Седлоски и репрезентативците имаат сериозен период за анализа и подготовка. Но прашањето што останува по оваа катастрофална есен е многу поголемо од резултатот против Словенија: дали македонскиот фудбал ќе успее да ја врати борбеноста, самодовербата и препознатливиот тимски дух пред најважниот предизвик во март?

CATEGORIES
Share This